قاراعاندى وبلىسىندا پوليتسەيلەر ءۇش ادامدى ولتىرگەن كۇدىكتىنى ء«ىزىن سۋىتپاي» قولعا ءتۇسىردى. قاسكۇنەم مۇنداي ارەكەتكە ءۇي يەسىمەن جانجالداسىپ قالعان سوڭ بارعانىن مويىندادى, دەپ حابارلايدى Egemen.kz.
13 تامىز كۇنى ساعات 15:40 شاماسىندا قاراعاندى وبلىسى, شەت اۋدانى اعادىر كەنتىندەگى جەكە ۇيلەردىڭ بىرىنەن دەنەلەرىندە پىشاق جاراقاتتارى بار 58 جاستاعى ءۇي يەسىمەن ونىڭ 59 جاستاعى جولداسى جانە 21 جاستاعى قىزىنىڭ مايىتتەرى تابىلدى.
وقيعا ورىنىنا قاراعاندى وبلىستىق پوليتسيا دەپارتامەنتى باستىعىنىڭ ورىنباسارى ەرنات قالياقپاروۆ باستاعان جەدەل تەرگەۋ توبى جانە وبلىستىق پروكۋراتۋرانىڭ قىزمەتكەرلەرى شىقتى.
«جەدەل ىزدەستىرۋ ءىس-شارالارى بارىسىندا پوليتسيا قىزمەكتەرلەرى وسى ىسكە قاتىسى بار دەگەن كۇدىكپەن 33 جاستاعى ادامدى ء«ىزىن سۋىتپاي» ۇستادى. ول اراداعى سوزگە كەلىسپەۋشىلىك بارىسىندا جابىرلەنۋشىلەرگە پىشاق جاراقاتىن سالعانىن مويىندادى», دەپ مالىمدەدى قاراعاندى وبلىستىق پد ءباسپاسوز قىزمەتىندەگىلەر. كۇدىكتى ۋاقىتشا ۇستاۋ يزولياتورىنا قامالدى.
اتالعان فاكتى بويىنشا قازاقستان رەسپۋبليكاسى قىلمىستىق كودەكسىنىڭ 99 بابى بويىنشا قىلمىستىق ءىس قوزعالدى. ءتيىستى ساراپتامالار تاعايىندالىپ, تەرگەۋ امالدارى جۇرگىزىلۋدە.