وتكەن تاۋلىكتە, 12 تامىزدا ەلوردانىڭ مونيتورينگتىك توپتارى قالانىڭ كاسىپكەرلىك وبەكتىلەرى اراسىندا 8 كارانتين بۇزۋشىنى انىقتادى, دەپ حابارلايدى Egemen.kz.
ەسىل اۋدانىندا بەلگىلەنگەن ۋاقىتتان كەيىن «پاناەحالي» بارى مەن «Opus One» مەيرامحاناسى كەلۋشىلەردى قابىلداعان. بايقوڭىر اۋدانىندا ورنالاسقان «زەيد» دەمالىس كلۋبىندا كارانتين شەكتەۋلەرىنىڭ ساقتالماعانى انىقتالدى.
جۇمىس رەجيمىنىڭ بۇزىلۋى الماتى اۋدانىنىڭ تاعى 5 مەكەمەسىندە – «پاناچي» بارىندا, «پلوۆ تسەنتر» كافەسىندە, «الانيا» تۇنگى كلۋبىندا, «تەما» كومپيۋتەرلىك كلۋبىندا جانە «دونەر» كافەسىندە تىركەلدى.
ءتارتىپ بۇزۋشىلارعا قاتىستى جينالعان بارلىق ماتەريالدار اكىمشىلىك سيپاتتاعى شارالار قابىلداۋ ءۇشىن سانيتارلىق-ەپيدەميولوگيالىق باقىلاۋ سالاسىنداعى ۋاكىلەتتى ورگانعا بەرىلدى.
ەستەرىڭىزگە سالا كەتەيىك, نۇر-سۇلتان قالاسىنداعى ەپيدەميولوگيالىق جاعداي تۇراقسىز بولىپ قالۋدا, كوروناۆيرۋسپەن اۋىراتىندار سانى وسۋدە. كۇن سايىن كوۆيدتىك اۋرۋحانالارعا اۋرۋدىڭ ورتاشا جانە اۋىر اعىمى بار ونداعان ناۋقاس تۇسەدى. ەلوردا تۇرعىندارى مەن قوناقتارى سانالى تۇردە ساننورمالار مەن شەكتەۋ شارالارىن قاتاڭ ساقتاۋى, ادامدار كوپ جينالاتىن ورىنداردان اۋلاق بولۋى جانە ءوز دەنساۋلىعى مەن اينالاسىنداعىلاردىڭ قاۋىپسىزدىگىن ساقتاۋ ءۇشىن ۆاكتسيناتسيالانۋى ءتيىس.