شىعىس قازاقستان وبلىسى ءۇرجار اۋدانىندا 7 مىڭ گەكتار جەر جالىعا وراندى, دەپ حابارلايدى Egemen.kz.
6 تامىزدا ساعات 17:00 شاماسىندا ءۇرجار اۋدانى ساعات اۋىلىنان 18 شاقىرىم جەردە قامىس ورتەنگەن. قۇتقارۋشىلار وقيعا ورنىنا كەلىپ, بارلاۋ جۇرگىزدى.
«ساسىقكول جاعاسىنداعى باتپاقتى جەردە قامىس جاندى. ءورت وشاعىنا جەتۋ قيىنعا سوقتى. ءورت سوندىرۋشىلەر, جەرگىلىكتى اتقارۋشى ورگان وكىلدەرى, «الاكول مەملەكەتتىك تابيعي قورى» رمم قىزمەتكەرلەرى ءتىلسىز جاۋدى اۋىزدىقتاۋعا كىرىستى. سونىمەن قاتار ءورت اۋقىمىن انىقتاۋ جانە ءسوندىرۋدىڭ دۇرىس باعىتىن تاڭداۋ ءۇشىن «ان-2» ۇشاعىمەن مونيتورينگ جۇرگىزىلگەن. جەردىڭ باتپاقتى بولۋىنان جانە قاتتى جەلدىڭ سالدارىنان وتتى ءوشىرۋ قيىنداي ءتۇستى. ءورت 12 تامىز كۇنى ساعات 10.00-دە تولىقتاي ءسوندىرىلدى. جالىن شارپىعان اۋماق 7 مىڭ گەكتاردى قۇرادى», دەپ جازىلعان شقو تجد ءباسپاسوز قىزمەتىنىڭ اقپاراتىندا.