قوستاناي وبلىسىنىڭ تۇرعىندارىن كوروناۆيرۋسقا قارسى ەكپەمەن قامتۋ ماقساتىندا مەكتەپتەردە ۆاكتسينا پۋنكتتەرى اشىلدى, دەپ حابارلايدى Egemen.kz قازاقپارات سايتىنا سىلتەمە جاساپ.
«حالىقتىڭ باسىم بولىگىن ۆاكتسينامەن قامتۋ ءۇشىن بارلىق ءىس-شارالاردى قابىلداپ جاتىرمىز. سول سەبەپتى مەكتەپتەردەگى مەديتسينا پۋنكتتەرىن جۇمىلدىرۋدامىز. قوستاناي اكىمىنىڭ باستاماسىمەن قالاداعى بىرقاتار مەكتەپتە ەكپە پۋنكتتەرى اشىلدى. بۇل پۋنكتتەر قانداي دا ءبىر سەبەپتەرمەن ەمحاناعا كەلە المايتىن نەمەسە ەمحانادان شالعايدا تۇراتىن حالىقتى قامتۋ ءۇشىن اشىلىپ وتىر. كۇن سايىن تاڭەرتەڭ ۆاكتسينا اكەلىنەدى, ال كەشكىسىن ەمحاناعا جەتكىزىلەدى. بارلىق شارتتار قاتاڭ ساقتالادى», دەدى قالالىق №4 ەمحانانىڭ باس دارىگەرى مارگاريتا بيسەنوۆا.
مەكتەپتەردىڭ جانىنا ەكپە پۋنكتتەرىن اشۋ تۋرالى شەشىم كوروناۆيرۋسقا قارسى ءىس-قيمىل جونىندەگى قالالىق شتاب وتىرىستارىنىڭ بىرىندە قابىلدانعان بولاتىن.
قوستاناي قالاسى اكىمىنىڭ ورىنباسارى سايات شايمۇرىنوۆتىڭ اتاپ وتۋىنشە, قالانىڭ شاعىن اۋداندارىنداعى پۋنكتتەر تۇرعىندارعا قولايلى بولۋى ءۇشىن اشىلعان. ولار تاڭەرتەڭنەن كەشكە دەيىن دەمالىسسىز جۇمىس ىستەيدى.
«قوستانايدا قوسىمشا پۋنكتتەردەن بولەك ساۋدا ويىن-ساۋىق ورتالىقتارىندا جىلجىمالى پۋنكتتەر دە جۇمىس ىستەپ تۇر. ال قوسىمشا پۋنكتتەر ەمحانالارعا جۇكتەمەنى ازايتۋ جانە شالعاي شاعىن اۋداندار مەن قالا ماڭىنداعى ەلدى مەكەندەردىڭ تۇرعىندارىنا قولايلى بولۋى ءۇشىن اشىلدى. ادامدار جۇمىستان كەيىن ەمىن-ەركىن جاقىن ماڭداعى مەكتەپتەن ەكپە الۋى ءۇشىن جاسالدى», دەدى سايات ءشايجۇنىسوۆ.
بۇگىنگە دەيىن قوستانايدىڭ 250 مىڭ تۇرعىنىنىڭ 90 مىڭى ۆاكتسينا الىپ ۇلگەردى. جالپى قالادا 164 مىڭ ادام ۆاكتسينا سالدىرۋى ءتيىس.