شارىن مەملەكەتتىك ۇلتتىق تابيعي پاركىنىڭ اۋماعىندا «تابيعات تاعدىرى ءبىزدىڭ قولىمىزدا!» اتتى ەكورەيد وتكىزىلدى, دەپ جازادى Egemen.kz.
ەكواكتسيا بارىسىندا اۋماقتى تازالاۋ جۇمىستارى جۇرگىزىلدى. سونداي-اق, كەلۋشىلەرگە تۋريستىك مارشرۋتتاردا سانيتارلىق نورمالار مەن قاۋىپسىزدىك تەحنيكاسى ەرەجەلەرىن ساقتاۋ تۋرالى تۇسىندىرمە پاراقشاسى تاراتىلدى.
شاراعا پارك قىزمەتكەرلەرى, الماتى وبلىسى ۇيعىر اۋداندىق پوليتسيا بولىمشەسى قىزمەتكەرلەرى مەن ەرىكتىلەر اتسالىستى. سونداي-اق قازاقستاننىڭ حالىق ءارتىسى, ءانشى روزا رىمباەۆا دا قاتىستى.
«تابيعات – ءبىزدىڭ ءۇيىمىز, بايلىعىمىز. ادام ءوز ءۇيىن تازا ۇستايدى, اۋلاسىن تازالايدى. سوندىقتان تابيعاتقا دا وسىلاي قاراۋ كەرەك», دەدى ر. رىمباەۆا.
«رەيد كەزىندە ءتۋريستىڭ بەلگىلەنبەگەن جەرگە قوقىس تاستاۋ فاكتىسى تىركەلدى. ينسپەكتور اكىمشىلىك قۇقىق بۇزۋشىلىق تۋرالى حاتتاما جاسادى. سونىمەن قاتار, تۋريستەرگە ساياباقتا وزەنگە شومىلۋعا تىيىم سالىنعانى تۋرالى ەسكەرتىلدى», دەپ جازادى ەكولوگيا, گەولوگيا جانە تابيعي رەسۋرستار مينيسترلىگىنىڭ ءباسپاسوز قىزمەتى.