قر ەڭبەك جانە حالىقتى الەۋمەتتىك قورعاۋ مينيسترلىگىنىڭ تاپسىرىسى اياسىندا «ەڭبەك رەسۋرستارىن دامىتۋ ورتالىعى» اق قازاقستان بويىنشا 2050 جىلعا دەيىن ۇزاقمەرزىمدى دەموگرافيالىق بولجام دايىندادى, دەپ جازادى Egemen.kz.
ساراپشىلار ستاتيستيكالىق دەرەكتەر مەن مودەلدەۋ نەگىزىندە 2030 جىلعا قاراي جۇمىس كۇشىنىڭ سانى 9,7 ملن ادامعا جەتىپ, 2040 جىلى بۇل كورسەتكىش 10,7 ميلليوندى قۇرايدى, ال 2050 جىلعا قاراي 11,4 ميلليونعا دەيىن وسەدى دەپ ەسەپتەيدى.
بۇل رەتتە, بولجامدىق نەگىزگى ستسەناري بويىنشا 2030 جىلعا قاراي ەل حالقى شامامەن 20,7 ملن ادامدى قۇرايدى, 2040 جىلعا قاراي اتالعان كورسەتكىش 22,9 ملن ادامعا دەيىن جەتىپ, ال 2050 جىلعا قاراي 25,5 ملن ادامعا دەيىن وسەدى دەپ كۇتىلەدى.
«بولجامعا سايكەس 2030 جىلعا قاراي تۋدىڭ جوعارى دەڭگەيى مەن حالىقتىڭ قارتايۋىنا بايلانىستى جۇمىس كۇشىنىڭ حالىققا پايىزدىق قاتىناسى 46,7%-عا دەيىن تومەندەيدى. بۇل ەكونوميكالىق بەلسەندى حالىققا جۇكتەمە وسەتىنىن بىلدىرەدى», دەدى ەردو بولجامداۋ دەپارتامەنتىنىڭ ديرەكتورى دميتري شۋمەكوۆ.
سونداي-اق, ءوز بولجامىندا ەردو ساراپشىلارى 2050 جىلعا قاراي حالىق سانىنىڭ وڭىرلىك سايكەسسىزدىگىنىڭ كۇشەيەتىنىن اتاپ ءوتتى. تۇرعىندار سانىنىڭ ەڭ كوپ ءوسۋى رەسپۋبليكالىق ماڭىزى بار قالالاردا كۇتىلەدى: نۇر-سۇلتان – 2,7 ەسە (1,9 ميلليون), الماتى – 1,8 ەسە (1,6 ميلليون) جانە شىمكەنت – 2,4 ەسە (1,5 ميللليون). بۇدان باسقا, ماڭعىستاۋ وبلىسىنىڭ حالقى ەكى ەسەگە (1,4 ملن ادامعا دەيىن), تۇركىستان وبلىسىندا 500 مىڭعا (2,5 ميلليونعا دەيىن), ال الماتى وبلىسىندا 700 مىڭعا (2,8 ميلليونعا دەيىن) كوبەيۋى ىقتيمال.
اعىمداعى تۋ, ءولىم-ءجىتىم جانە كوشى-قون كوەففيتسيەنتتەرى تۇرعىسىندا شىعىس قازاقستان, قاراعاندى, قوستاناي, سولتۇستىك قازاقستان, پاۆلودار جانە اقمولا وبلىستارىندا حالىق سانىنىڭ بىرتىندەپ تومەندەۋى بايقالاتىن بولادى. الايدا, جالپى تۋ كوەففيتسيەنتى كورسەتىلگەن ايماقتاردا ۋاقىت وتە كەلە ايتارلىقتاي ءوسىپ, ەتنيكالىق قۇرىلىمىنىڭ وزگەرۋىنە جانە ناقتى كىرىسىنىڭ ارتۋىنا بايلانىستى تۇرعىنداردىڭ قونىس اۋدارۋى تومەندەسە, وسى ايماقتارداعى حالىق سانى تۇراقتانۋى مۇمكىن.
2050 جىلعا دەيىنگى ۇزاقمەرزىمدى دەموگرافيالىق بولجام مىناداي باعىتتار بويىنشا جاسالدى: حالىقتىڭ جالپى سانى, حالىقتىڭ جاس قۇرامى, 2050 جىلعا قاراي ستسەناريلەر بويىنشا جاس قۇرامىنداعى ايىرماشىلىقتار, وڭىرلىك سايكەسسىزدىكتەر, وڭىرلەر بويىنشا حالىق سانى, دەموگرافيالىق قارقىن, جۇمىس كۇشىنىڭ سانى,قۇرىلىمى جانە ورتاشا جاسى, ونىڭ وڭىرلىك سايكەسسىزدىكتەرى, وڭىرلەر بويىنشا ءبولۋ جانە تاعى باسقا.
سونىمەن بىرگە, 2021 جىلعى دەموگرافيالىق كورسەتكىشتەردىڭ ناقتى وزگەرىسى نەگىزىندە وسى بولجامعا تۇزەتۋ جاساۋ جوسپارلانعان.
«بولجام ءتورت قۇرامداس بولىكتىڭ نەگىزىندە قۇرىلادى: حالىقتىڭ باستاپقى ناقتى سانى, تۋ, ءولىم-ءجىتىم جانە حالىقتىڭ كوشى-قون قوزعالىسى. بۇل 2022 جىلدىڭ وزىندە جاڭا ستاتيستيكالىق دەرەكتەر بۇگىنگى تاڭدا وزەكتى بولىپ وتىرعان باعالاۋلاردان ايتارلىقتاي وزگەشە بولۋى مۇمكىن دەگەندى بىلدىرەدى. تيىسىنشە بۇل دەموگرافيالىق بولجامدى جاڭارتۋ قاجەتتىلىگىنە اكەلۋى مۇمكىن», دەپ تۇيىندەدى دميتري شۋمەكوۆ.