تۇرىكمەنستاندا وتكەن ورتالىق ازيا ەلدەرى پرەزيدەنتتەرىنىڭ كونسۋلتاتيۆتىك كەزدەسۋى شىنىمەن دە الداعى ۋاقىتتا اتالعان ءوڭىر ءۇشىن تاعدىرشەشتى بولعالى تۇر.
مەملەكەتتەر باسشىلارىنىڭ ءوڭىردىڭ دامۋى مەن ءوزارا ينتەگراتسياسىنا قاتىستى 28 باپتان تۇراتىن بىرلەسكەن مالىمدەمەسى وتە قۇندى. باۋىرلاس ەلدەر تاۋەلسىزدىكتەرىنىڭ 30 جىلدىعى قارساڭىندا وتكەن كەزدەسۋدە ارال تەڭىزىنەن باستاپ, سۋ ماسەلەسى جانە قازىرگى جاھاندى الاڭداتقان پاندەميا دا تالقىلانىپتى.
تاريحقا سۇيەنەر بولساق, ورتالىق ازيا مەملەكەتتەرى دەربەس ءارى تاۋەلسىز جاعدايدا ءوز تاعدىرلارىن ءدال وسىنداي فورماتتا تالقىلاماعان. ۇنەمى باتىس پەن شىعىستىڭ گەوساياسي مۇددەسىندە تۇراتىن ءتىلى, ءدىلى, مەنتاليتەتى ۇقساس ورتالىق ازيا ەلدەرى زاماناۋي سىن-قاتەرلەردى قازىرگى كەزەڭدە دۇرىس باعامداعان سەكىلدى. تۇركى تىلدەس ەمەس جالعىز ەل – تاجىكستان شەكاراسىنا تىرەلىپ توقتاعان اۋعانستانداعى جاعداي دا ايماقتاعى ونىمەن شەكتەسەتىن تاعى ءبىر ەل – وزبەكستاننىڭ عانا ەمەس, وڭىردەگى 70 ملن-عا جۋىق حالقى بار وزگە ەلدەردىڭ دە ورتاق ماسەلەسى.
ودان بولەك, سوڭعى جىلدارى الەمدىك ارەنادا ءتۇرلى باستاماشىلىق يدەيالارىمەن كوزگە تۇسەتىن قازاقستاننان بولەك, ورتالىق ازيا ەلدەرىنىڭ دە تىڭ ۇسىنىستار كوتەرىپ جۇرگەنىن ءجيى بايقايمىز. ماسەلەن, وسى كەزدەسۋدە وزبەك تاراپىنىڭ بىرىككەن ۇلتتار ۇيىمى اياسىندا كولىكتىك-كوممۋنيكاتسيالىق ءوزارا بايلانىستى دامىتۋدىڭ وڭىرلىك ورتالىعىن قۇرۋ تۋرالى باستاماسى قولداۋ تاپتى.
وعان قوسا, مەملەكەتتەر باسشىلارى تاجىكستان پرەزيدەنتى ە.راحموننىڭ 2025 جىلدى حالىقارالىق مۇزدىقتاردى ساقتاۋ جىلى دەپ جاريالاۋ جانە مۇزدىقتاردى قورعاۋ حالىقارالىق قورىن قۇرۋ تۋرالى ۇسىنىسىن دا قولداعانىن جانە تۇرىكمەنستان پرەزيدەنتىنىڭ تومەن كومىرتەكتى ەنەرگەتيكانى دامىتۋ جونىندەگى شارالاردى جۇزەگە اسىرۋعا باعىتتالعان بۇۇ ستراتەگياسىن ازىرلەۋ تۋرالى باستاماسىنا, سونداي-اق بۇۇ اياسىندا ەنەرگەتيكاداعى باسىم باعىتتاردىڭ ءبىرى رەتىندە سۋتەگىن دامىتۋ جونىندەگى حالىقارالىق «جول كارتاسىن» قۇرۋعا قولداۋ بىلدىرگەنىن دە ايتقان ءجون.
ورتالىق ازيا كوشباسشىلارىنىڭ كونسۋلتاتيۆتىك كەڭەسىنىڭ بىرىڭعاي ءرامىزى تۋرالى دا شەشىم وسى جولى شەشىلىپتى. الداعى ۋاقىتتا تۇراقتى تۇردە وتەتىن كونسۋلتاتيۆتىك كەڭەستەر ناتيجەسىندە ايماقتاعى ەڭ كۇيىپ تۇرعان شەكارا مەن انكلاۆتار ماسەلەسى جانە اۋىز سۋدى بەس ەل ءوزارا بولىسكە سالعاندا دا وڭ شەشىمدەر قابىلدانادى دەپ ۇمىتتەنەمىز.
ولجاس بەركىنباەۆ,
ورتالىق ازيا بويىنشا شولۋشى