كارانتين تالاپتارىن بۇزعان جانە موبيلدىك توپقا باعىنباعاندار اكىمشىلىك جاۋاپكەرشىلىككە تارتىلادى. قاراعاندىدا ەكى ەر ادامدى بەس تاۋلىككە دەيىن قاماۋعا الۋ نەمەسە 20 اەك كولەمىندە ايىپپۇل كۇتىپ تۇر, دەپ حابارلايدى Egemen.kz.
8 تامىزدا «109» تەلەفونىنا ش.جانداربەكوۆا كوشەسىندەگى ساياجايدا سالتاناتتى ءىس-شارا ءوتىپ جاتقاندىعى تۋرالى حابارلاما تىركەلدى. وقيعا ورنىنا پوليتسيا قىزمەتكەرلەرىنىڭ ءموبيلدى توبى, اكىمدىك پەن سەس وكىلدەرى كەلدى. كارانتيندىك نورمالاردى بۇزۋ فاكتىسىن تىركەۋ كەزىندە ءۇيدىڭ 50 جاستاعى يەسى مەن ونىڭ 54 جاستاعى اعاسى ءموبيلدى توپ مۇشەلەرىنە كەدەرگى كەلتىردى.
«قازىرگى ۋاقىتتا اقبتك-ءتىڭ 667-بابى بويىنشا اكىمشىلىك ءىس قوزعالدى. بۇل باپ بويىنشا, ءتارتىپ بۇزۋشىلارعا جيىرما ايلىق ەسەپتىك كورسەتكىش مولشەرىندە ايىپپۇل سالىنادى نەمەسە بەس تاۋلىككە دەيىن اكىمشىلىك قاماۋعا الىنادى. ماتەريال سوتتىڭ قاراۋىنا جىبەرىلدى», دەپ حابارلادى قاراعاندى وبلىسى دپ ءباسپاسوز قىزمەتى.