اقمولا وبلىستىق سوتى بىرنەشە جىل بويى دوستارىمەن بىرگە كامەلەتكە تولماعان قىزدى زورلاپ كەلگەن ەر ادامعا قاتىستى اقتاۋ ۇكىمىنىڭ كۇشىن جويدى, دەپ حابارلايدى Egemen.kz zakon.kz-كە سىلتەمە جاساپ.
«اقمولا وبلىستىق سوتىنىڭ قىلمىستىق ىستەر جونىندەگى سوت القاسىنىڭ قاۋلىسىمەن ك.- عا قاتىستى اقمولا وبلىستىق سوتىنىڭ اقتاۋ ۇكىمىنىڭ كۇشى جويىلدى جانە قىلمىستىق ءىس سول سوتتىڭ وزگە قۇرامداعى جاڭا قاراۋىنا جىبەرىلدى. سوت القاسى جابىرلەنۋشىنىڭ زاڭدى وكىلىنىڭ اپەللياتسيالىق شاعىمىن جانە پروكۋروردىڭ سمج ۇكىمىنە نارازىلىعىن قاناعاتتاندىردى», دەپ حابارلادى سوتتا.
2021 جىلعى 8 ماۋسىمدا اقمولا وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا القابيلەر سوتى جاس بالانى زورلاۋ ءىسى بويىنشا ەر ادامعا قاتىستى اقتاۋ ۇكىمىن شىعاردى.
القابيلەر ۇكىمىنىڭ نەگىزىندە ول قر قك 120-بابى 4-بولىگى «جاس بالالاردى زورلاۋ» بويىنشا قىلمىستىق قۇقىق بۇزۋشىلىق جاساۋعا بايلانىستى وقيعانىڭ بولماۋىنان اقتالدى.
وبلىستىق سوتتا تۇسىندىرىلگەندەي, القابيلەر القاسىن قۇرۋ كەزىندە ءىس جۇرگىزۋ زاڭىنىڭ ەلەۋلى بۇزۋشىلىقتارى جانە ءىس بويىنشا دالەلدەمەلەردى زەرتتەۋ ءتارتىبى ۇكىمنىڭ كۇشىن جويۋعا نەگىز بولدى.