ءشوپ ناۋقانى باستالعالى شىعىستىقتاردىڭ مۇرىندارىنا سۋ جەتپەي ءجۇر. مالمەن جان باعىپ وتىرعان جۇرتتىڭ جامباستاپ جاتار جايى جوق. اسىرەسە تاۋلى ولكەنىڭ تۇرعىندارى ءۇشىن قىستىڭ مىڭ كۇنىن اسىرايتىن جازدىڭ ءبىر كۇنى قىمبات.
مالدىڭ قىسقى ازىعىن دايىنداۋ ناۋقانىن باستاپ كەتكەن ءوڭىر شارۋالارى بيىل پىشەن ءتۇسىمىنىڭ وتكەن جىلدارمەن سالىستىرعاندا الدەقايدا مول بولاتىنىن ايتىپ وتىر. وبلىستىق اۋىل شارۋاشىلىعى باسقارماسى باسشىسى ورىنباسارىنىڭ مىندەتىن اتقارۋشى ەرتاي قۋانباەۆتىڭ بەرگەن مالىمەتىنە سۇيەنسەك, بيىل توپىراق قاباتىنىڭ ىلعالىن, جاۋىن-شاشىن ءتۇسىمىن ەسكەرگەن ءوڭىر شارۋالارى 2 490 توننا ءشوپ شابۋدى جوسپارلاپ وتىرعان كورىنەدى.
– وسى جىلى شابىندىقتار مەن تابيعي جايىلىمداردان پىشەننىڭ جوسپارلانعان ءتۇسىمى گەكتارىنا جەتى تسەنتنەردەن بولادى دەپ بولجاپ وتىرمىز. وتكەن جىلى بۇل كورسەتكىش گەكتارىنا 6,9 تسەنتنەردى قۇراعان بولاتىن. ال ەگىستىكتەردە وسىرىلگەن بىرجىلدىق شوپتەردەن پىشەننىڭ جوسپارلانعان ءتۇسىمى گەكتارىنا 14,1 تسەنتنەردى قۇرايدى دەپ بولجانۋدا. بىلتىر بۇل كورسەتكىش گەكتارىنا 16,5 تسەنتنەردى قۇراعان ەدى. سونىمەن قاتار ەگىستىكتە وسىرىلگەن كوپجىلدىق شوپتەردەن پىشەننىڭ ءتۇسىمى گەكتارىنا 21,3 تسەنتنەردەن بولادى دەپ وتىرمىز. بۇل كورسەتكىش وتكەن جىلعى دەڭگەيدە قالىپ وتىر, – دەيدى ە.قۋانباەۆ.
بيىل وڭىردەگى شارۋاشىلىقتاردىڭ ءشوپ شابۋ ناۋقانىنا دەگەن دايىندىعى – 100 پايىز. ستاتيستيكالىق دەرەكتەرگە سۇيەنسەك, وبلىس بويىنشا ءشوپ شابۋ ناۋقانىنا 1 700-گە جۋىق شارۋاشىلىق جۇمىلدىرىلدى. جالپى سانى 38,5 مىڭ اۋىل شارۋاشىلىعى تەحنيكاسى ءشوپ شابۋعا شىقسا, ونىڭ 17 مىڭى تراكتورلار, ال قالعانى – جەمشوپ جينايتىن كومبايندار, ءشوپ شاپقىشتار, جۇك كولىكتەرى مەن باسقا دا تەحنيكالار.
الايدا شارۋا قوجالىقتارى باسشىلارىنىڭ ايتۋىنشا, بيىل ءشوپ سۇيىق. بىلتىرعىداي قور جوق كورىنەدى. ماسەلەن, كوكپەكتىلىك شارۋالار قىرناپ-تىرناپ قىستىق ازىقتى دايىنداعان. ارتىلسا, اۋىل تۇرعىندارىمەن بولىسەدى.
– بيىل شابىندىق ەشكىمدى قۋانتا قويعان جوق. وڭىردەگى كەيبىر شارۋا قوجالىقتارىمەن ءوزارا الماسۋ ناتيجەسىندە عانا ءبىز قاجەتتى مال ازىعىن جيناپ الدىق. جوڭىشقا پىشەنگە شابىلدى, سابان ورامعا ورالادى. سەبەبى ءوزىمىزدى عانا ويلاماي تۇرعىندارعا دا كومەك بەرۋىمىز كەرەك. جەمشوبى مۇلدەم جوق جاندارعا قالاي دا كومەك قولىن سوزۋ قاجەت. بىراق وكىنىشكە قاراي, جىلداعىداي حالىققا ءشوپ ساتۋ بيىل مۇمكىن ەمەس. كەيبىر جەردى تۇرعىندار وزدەرى شاۋىپ الادى, – دەيدى «قاليساتتار ۇلى» شارۋا قوجالىعىنىڭ باسشىسى سامارحان جوتاباەۆ.
بۇل ماسەلە كوكپەكتى اۋدانىندا عانا ەمەس, قار قالىڭ تۇسەتىن بارلىق اۋدانعا ءتان. تۇرعىنداردىڭ كوبى تاۋداعى بۇتا-قاراعاندى ارالاپ شاۋىپ ءجۇر. جازدىڭ العاشقى ايىندا جاۋىن-شاشىن مولشەرى از تۇسكەندىكتەن بولسا كەرەك, شابىندىق كوتەرىلە المادى. ءشوبى بەلۋاردان كەلەتىن كاتونقاراعاي اۋدانى دا شوپتەن تارشىلىق كورىپ وتىرعانى بەلگىلى. دەمەك جەمشوپ جەتكىلىكسىز بولسا, مال باعاسى دا ءتۇسىپ كەتۋى مۇمكىن. بۇل – مال ساتىپ, ناپاقا تاۋىپ وتىرعان قاراپايىم جۇرتتىڭ ۋايىمى. كىم ءبىلسىن, ءبىزدىڭ جاقتا شوجەنى كۇزدە سانايدى. ءشوپ ناۋقانى ءالى اياقتالا قويعان جوق.
شىعىس قازاقستان وبلىسى