ەل ىشىندە «جامان تۇماۋدىڭ» تىيىلماي تۇرعانىنا سەبەپشى بولىپ وتىرعان «قازاقتىڭ تويى» دەگەن تۇسىنىك تۇپكىلىكتى قالىپتاستى. بۇلاي دەۋگە نەگىز بار. جاسىراتىنى جوق, بۇگىندە ەلىمىزدىڭ بارلىق قالاسىندا جاسىرىن تويلار ءوتىپ جاتىر. بۇعان تىيىم سالۋعا جەرگىلىكتى اتقارۋشى ءھام قۇزىرلى ورگانداردىڭ شاماسى كەلمەي قالدى.
«توي دەگەندە قۋ باس دومالايدى» دەگەن تويقۇمار حالىق ولگەن-تىرىلگەنىنە, شەكتەۋلەرگە قاراماستان, وتقا ۇيمەلەگەن كوبەلەكشە تويحانالاردىڭ ارتقى ەسىگىن اڭدىپ ءجۇر. «بارماسام اعايىننىڭ, دوستىڭ بەتىنە قالاي قارايمىن», دەگەن جالعان نامىستىڭ, نادان تۇسىنىكتىڭ جەتەگىندەگى ولار وسى قىلىقپەن وزىنە عانا ەمەس, اينالاسىنداعى حالىققا قانشا زالال تيگىزىپ جۇرگەنىن باعامدار دا ەمەس.
قازىرگى تاڭدا تويلاردىڭ «جابىق ەسىك جاعدايىندا» ءوتىپ جۇرگەنىن جۇرت تا, بۇعان تىيىم سالۋعا ءتيىس قۇقىق قورعاۋ ورگاندارى مەن اتقارۋشى بيلىكتىڭ وكىلدەرى دە جاقسى بىلەدى. ارا-اراسىندا جاۋاپكەرشىلىككە تارتىلىپ, ايىپپۇل تولەپ جاتقانى قانشاما؟! ايتسە دە, ەكى ءجۇز, ءتىپتى ودان دا كوپ ادامعا استا-توك توي جاساۋ مەن كارانتين تالاپتارىنا «تۇكىرىپ قويعان» تارتىپسىزدىكتەر تىيىلماي تۇر. ءبىر سوزبەن ايتقاندا, ءتىرى قالۋدى ويلاۋدان گورى توي جاساپ, تاۋەكەلگە باس تىگۋدىڭ ءباسى جوعارى تۇرعانداي.
جاسىراتىنى جوق, قۇزىرلى ورگاندار قانشا جەردەن «قىلبۇراۋ» سالسا دا, ىنساپسىز كاسىپكەرلەر مەن تويقۇمار قاۋىم نەبىر قيتۇرقى ايلا-ءتاسىلدى ويلاپ تاۋىپ, ءوز دەگەندەرىن ىسكە اسىرىپ ءجۇر. مۇنىڭ تەرەڭىنە ۇڭىلە بەرسەڭ, جەڭ ۇشىنان جالعاسقان سىبايلاستىقتىڭ دا قىلتيىپ تۇرعان قۇلاعىن بايقاۋعا بولۋشى ەدى...
ەندى زاڭنىڭ قاتاڭ تالاپتارىنا باعىنباي وتىرعان قازاقى تويشىل مەنتاليتەتتى تارتىپكە قالاي كوندىرۋگە بولادى؟ قاراپ تۇرساڭىز, بۇل قۇبىلىس جولىنداعىسىن تۇگەل جاپىرىپ, توقتايتىن ءتۇرى جوق. وسى ورايدا امالدىڭ جوقتىعىنان مىناداي ۇسىنىس ايتۋعا تۋرا كەلىپ تۇر.
قازىر عوي, كوپشىلىك جەرلەردە Ashyq قوسىمشاسى ىسكە قوسىلىپ, شەكتەۋ شارالارىنىڭ تارتىپتىلىگى ءبىر ىزگە تۇسە باستادى. ماسەلەن, كوروناۆيرۋس ينفەكتسياسىنان امان-ساۋ ەكەنىڭىزدى دالەلدەيتىن قاعازىڭىز بولسا ءبىتتى: ءسىز ءۇشىن بارلىق ەسىك اشىق. مىنە, وسى ءتاسىلدى تويعا نەگە قولدانباسقا؟
مىسالى, بۇل ءىستى بىلايشا جۇزەگە اسىرۋعا بولۋشى ەدى. توي جاسايتىن ادام تىعىلماي كەلىپ جەرگىلىكتى اتقارۋشى ورگاندارعا ءوتىنىم تۇسىرەدى. سايكەسىنشە, بۇل جاۋاپتى ۇيىم نەمەسە ارنايى قۇرىلعان كوميسسيا تويعا كەلگەن ادامداردىڭ Ashyq قوسىمشاسى ارقىلى تەكسەرۋدەن ءوتۋىن ۇيىمداستىرىپ بەرەدى. ياعني تويحانانىڭ ىشىنە تەك «جامان تۇماۋدان» ساۋ نەمەسە ەكپە العان ادامدار عانا وتەدى. ءدال وسى ءتاسىل ءداستۇرلى اس بەرۋ سياقتى باسقا دا ادام كوپ جيىلاتىن ءىس-شارالارعا دا قولدانىلسا...
البەتتە, بۇل ۇسىنىس بازبىرەۋلەرگە قارابايىرلاۋ, ءتىپتى كۇلكىلى بولىپ كورىنۋى دە مۇمكىن. ونداي سكەپتيكتەرگە ايتارىمىز: ىندەتتىڭ ورشۋىنە تىكەلەي كىنالى بولىپ, تولاستاماي تۇرعان توي-دۋماندى باسقا قانداي جولمەن تارتىپكە سالار ەدىڭىز؟
رەسمي مالىمەتكە ساي, وتكەن تاۋلىك ىشىندە قاراعاندى وبلىسى بويىنشا 941 ادام كوروناۆيرۋس ينفەكتسياسىن جۇقتىرىپ, پروۆيزورلىق ستاتسيونارلارعا جاتقىزىلدى. ال ەندى وسى ناۋقاستاردىڭ ىشىندە تويدا ءجۇرىپ, «جامان تۇماۋدى» تاراتقانى نەمەسە جۇقتىرىپ العانى قانشاما دەسەڭىزشى؟!
توقسان اۋىز ءسوزدىڭ توبىقتاي ءتۇيىنى, زاڭنىڭ تەمىردەي قاتاڭ ءتارتىبى توقتاتا الماعان تويدى تەك وسى تۇزەۋى بەك مۇمكىن دەپ Ashyq قوسىمشاسىنا عانا ءۇمىت ارتۋعا تۋرا كەلىپ تۇر.
قاراعاندى وبلىسى