توكيو وليمپياداسىندا قازاقستاندىق سپورتشىلار اراسىندا كوروناۆيرۋس وقيعالارى تىركەلدى مە؟ سۇراققا قر مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ توراعاسى سەرىك ساپيەۆ جاۋاپ بەردى, دەپ حابارلايدى Egemen.kz.
ء«بىزدىڭ سپورتشىلار اراسىندا كوروناۆيرۋس اۋرۋى تىركەلگەن جوق. ءبىز بارلىق سانيتارلىق نورمالاردى ساقتادىق. وليمپيادا باستالار الدىندا ءۇش كۇن بويى بارلىق سپورتشىلار مەن دەلەگاتسيا مۇشەلەرى كارانتينگە وقشاۋلاندى. ءبارى جاقسى ءوتىپ جاتىر. ءبىزدىڭ سپورتشىلاردىڭ ەشقايسىسى اۋىرعان جوق», دەپ جاۋاپ بەردى س. ساپيەۆ ورتالىق كوممۋنيكاتسيالار قىزمەتىندە.
جالپى, وليمپيادا باستالعاننان بەرى جارىسقا قاتىسۋشى نەمەسە ونى ۇيىمداستىرۋشىلار اراسىندا كوروناۆيرۋس جۇقتىرۋدىڭ 246 جاعدايى انىقتالعان.
«وليمپيادادا COVID-19 جۇقتىرۋ فاكتىلەرى ءالى دە تىركەلۋدە. توكيودا سوڭعى تاۋلىكتە 21 ادام كوروناۆيرۋسقا شالدىقتى. ولاردىڭ اراسىندا جازعى وليمپيادا ويىندارىنا قاتىسۋشىلاردىڭ جوقتىعى قۋانتادى. وليمپيادا باستالعاننان بەرى جارىسقا قاتىسۋشى نەمەسە ونى ۇيىمداستىرۋشىلار اراسىندا كوروناۆيرۋس جۇقتىرۋدىڭ 246 جاعدايى انىقتالدى», دەلىنگەن قازاقستاندا Covid-19 تارالۋىنا جول بەرمەۋ جونىندەگى ۆەدومستۆوارالىق كوميسسيا حابارلاماسىندا.