ەكىنىشى ورتا سالماقتا جۇدىرىقتاسىپ جۇرگەن قازاقستاندىق ءالي احمەدوۆ ەرتەڭ كاسىپقوي رينگتەگى ءوزىنىڭ كەزەكتى جەكپە-جەگىن وتكىزەدى, دەپ جازادى Egemen.kz.
26 جاستاعى الماتى وبلىسىنىڭ تۋماسى اۋەلى اۋەسقويلار اراسىندا تانىلدى. بىرقاتار ءىرى حالىقارالىق تۋرنيرلەردە جەڭىسكە جەتىپ, ستۋدەنتتەر اراسىندا الەم چەمپيونى اتاندى. 2016 جىلى كاسىپقوي بوكسقا اۋىسىپ, قاتارىنان 16 جەكپە-جەكتە جەڭىسكە جەتتى. 12 قارسىلاسىن ۇرىپ جىقتى. وسىنىڭ ەلەۋلى تابىسىنىڭ ارقاسىندا ول بىلتىرعى جىلدىڭ سوڭىندا IBو نۇسقاسى بويىنشا الەم چەمپيونى اتاعى ءۇشىن تالاسۋ مۇمكىندىگىنە يە بولدى. وكىنىشكە قاراي, احمەدوۆ 12 راۋندتا ەكۆادورلىق كارلوس گونگورادان نوكاۋتپەن ۇتىلىپ قالدى. مىنە, ەندى اراعا جەتى اي سالىپ جەرلەسىمىز قايتا شارشى الاڭعا شىققالى وتىر.
اقش-تىڭ البۋكەر قالاسىندا وتەتىن بوكس كەشىندە ءالي پەرۋ ەلىنىڭ وكىلى داۆيد زەگاررامەن كۇش سىناسادى. «پانتەرا» دەگەن بۇركەنشىك ەسىمگە يە بولعان 36 جاستاعى قارسىلاسىنىڭ كاسىپقوي رينگتە جۇرگەنىنە 16 جىلدان استى. سول كەزدەن بەرى 39 كەزدەسۋ وتكىزىپ, 34 رەت جەڭىسكە جەتتى. 21 باسەكەنى مەرزىمنەن بۇرىن اياقتادى.