تورتجىلدىقتىڭ باستى باسەكەسىندە بوسقىندار قۇراماسى دا باق سىناۋدا. وتانىنداعى قيىن جاعدايلارعا بايلانىستى تۋعان ەلىنەن كەتۋگە ءماجبۇر بولعان سپورتشىلار بيىل بولەك وداق قۇرىپ, ونەر كورسەتىپ جاتىر.
29 سپورتشىدان قۇرالعان توپ 12 سپورت ءتۇرى بويىنشا باق سىنايدى. حالىقارالىق وليمپيادا كوميتەتى بيىلعى دوداعا قاتىسۋعا ۇسىنىس بەرگەن 56 ءوتىنىشتى قاراستىرعان. ناتيجەسىندە, اۋعانستان, ۆەنەسۋەللا, كونگو دەموكراتيالىق رەسپۋبليكاسى, ەريترەيا, يران, يراك, كامەرۋن, كونگو رەسپۋبليكاسى, سيريا, سۋدان, وڭتۇستىك سۋدان سپورتشىلارىنا جولداما بەرىلدى.
«مەن بارلىق وليمپيادا قوزعالىسىنىڭ اتىنان سىزدەرمەن جۇزدەسىپ, توكيوداعى باسەكەگە دايىندىقتارىڭىزدى كورۋگە اسىق ەكەنىمىزدى بىلدىرگىم كەلەدى. سىزدەردىڭ ونەر كورسەتۋلەرىڭىز بۇكىل الەمگە مىقتىلىق پەن ءۇمىتتىڭ بەلگىسى بولماق», دەپ حوك باسشىسى توماس باح جولداما تابىستادى.
ەندى سپورتشىلار ءجۇزۋ, جەڭىل اتلەتيكا, بادمينتون, بوكس, ۆەلوسپورت, اۋىر اتلەتيكا, كۇرەس سىندى سپورت تۇرلەرى بويىنشا باق سىناپ ءجۇر. ماسەلەن, يۋسرا مارديني 100 مەترگە ءجۇزۋ بويىنشا ونەر كورسەتىپ ۇلگەردى. ناتيجەسى جاقسى بولماسا دا, كوپشىلىكتىڭ كوزىنە ءتۇسىپ ۇلگەردى. سيريالىق قىز 2015 جىلدان باستاپ گەرمانيادا تۇرادى. بۇل دوداعا بەس جىل دايىندالعان. بۇل – ونىڭ ەكىنشى وليمپياداسى. 2016 جىلى ريو-دە-جانەيروداعى وليمپيا ويىندارىندا بوي كورسەتكەننەن كەيىن باسىلىمدار يۋسرا تۋرالى جازا باستادى. ول ءوزىنىڭ تاعدىرى تۋرالى سىر شەرتىپ, سيريادان قاشقاندا ءسىڭلىسى ەكەۋىنىڭ رەزەڭكە قايىعىنىڭ جەلى شىعىپ كەتىپ, 3,5 ساعات بويى تەڭىزدە جۇزۋگە ءماجبۇر بولعاندىقتارىن ايتقان.
يۋسرا مارديني ەريترەيالىق جەڭىل اتلەت تاحلوۆيني گابريەسوسپەن بىرگە بوسقىندار قۇراماسىنىڭ جالاۋىن ۇستاپ شىعۋ مارتەبەسىنە يە بولدى. يۋسرا ول سەزىمدى جەتكىزۋگە ءسوز تاپپادىم دەپ اعىنان جارىلدى. ساراپشىلار بۇل ونىڭ سوڭعى قاتىسۋى دەپ بولجايدى. سپورتشى گەرمانيا ازاماتتىعىن الىپ, وقۋىن جالعاستىرىپ, سپورت مەكتەبىن اشۋدى ارماندايتىنىن ايتتى.
بۇل توپقا مۇشە بولۋ ءۇشىن سپورتشى وليمپياداعا ەنگىزىلگەن سپورت تۇرلەرى بويىنشا جوعارى ناتيجە كورسەتۋگە ءتيىس. سونىمەن قاتار بۇۇ راستاعان بوسقىن دەگەن مارتەبەگە يە بولۋى كەرەك. قۇرامانىڭ تولىق رەسمي اتى – بوسقىندار وليمپيادا قۇراماسى. ولار وليمپيادا جالاۋى مەن وليمپيادا ءانۇرانىن مەنشىكتەگەن. حوك ءار بوسقىندى كورسەتكەن ناتيجەسىنە قاراماستان وليمپيادا ستيپەندياسىمەن قولدايدى.
ەڭ العاش بوسقىندار قۇراماسى ريو-دە-جانەيرودا وتكەن وليمپيا ويىندارىنا قاتىسقان ەدى. وندا 10 سپورتشى ونەر كورسەتتى. كوبى ول كەزدە بۇل قۇرامانى بايقاماعانىن ايتادى. الايدا قازىر ولاردى بايقاماۋ مۇمكىن ەمەس. ويتكەنى بيىل ولاردىڭ سانى شامامەن 3 ەسەگە ءوستى. وعان قوسا, سپورتشىلاردىڭ تاعدىرى جۇرەكتى ەلجىرەتپەي قويمايدى. ءار تۇلعانىڭ ارتىندا اۋىر تاعدىر, ءبىر ۇلتتىڭ تاريحى جاتىر.
اۋعانستاندىق نيگارا شاحين – تالانتتى دزيۋدوشى. دەسە دە ءوز وتانىندا قىز بالاعا بۇل سپورت تۇرىمەن اينالىسۋعا رۇقسات جوق. سۇيىكتى ىسىمەن اينالىسقىسى كەلگەن جاس قىز ەلىن تاستاپ, رەسەيگە قونىس اۋدارعان.
جوعارىدا ەسىمى اتالعان تاحلوۆيني گابريەسوس 12 جاسىندا افريكانىڭ شىعىسىنداعى قالادان شىعىپ, يزرايلگە دەيىن جاياۋ جەتكەن. سۋدان مەن مىسىردىڭ ءشولىن جاياۋ كەسىپ وتكەن باتىر. بۇگىندە يزرايلدە تۇرىپ, جەڭىل اتلەتيكامەن اينالىسادى. ونى جەرگىلىكتى كلۋب قولدايدى, حوك ستيپەندياسىن الادى.
قۇرامادا يراننىڭ 5 ازاماتى بار. كيميا اليزادە تاەكۆوندودان 2016 جىلعى وليمپيا ويىندارىندا قولا جۇلدەگەر اتانعان. يراندا وليمپيادا مەدالىن تاققان العاشقى ايەل.
سپورتشىلاردىڭ باستى ماقساتى جەڭىس بولماۋى دا مۇمكىن. ولار الەمگە ءوز تاعدىرى مەن ەلىنىڭ تاريحىن ەستىرتكىسى كەلەدى. وسى ارقىلى جاقسى ومىرگە اياق باسىپ, بوسقىندار ماسەلەسىن شەشۋگە مۇمكىندىك العاندار دا از ەمەس. ماسەلەن, يۋسرا مارديني بۇۇ باعدارلامالارى اياسىندا بوسقىندار جاعدايىنا قاتىستى ماسەلەلەردى شەشۋگە كومەكتەسەدى. Under Armour كيىمدەر برەندىن تانىستىرادى.
ماسوما الي زادي – حالىقارالىق سپورت باسىلىمدارى قاۋىمداستىعىنىڭ تۇراقتى وكىلى. ازىرگە ەشقايسىسى كوش باستاپ, وزىپ شىقپاسا دا, حالىقارالىق ارەنادا بۇگىنگى كۇننىڭ ماڭىزدى ماسەلەلەرىنىڭ ءبىرىن كوتەرىپ جۇرگەنىنە قۋانىشتى ەكەنىن ايتادى.