WorldSkills ستاندارتتارى بويىنشا وتكەن ەۋرازيا چەمپيوناتىندا قازاقستاننىڭ ۇلتتىق قۇراماسى جەتى مەدالعا يە بولدى. قازاقستان كوللەدجدەرىنىڭ ۇزدىك ستۋدەنتتەرىنەن جاساقتالعان كوماندا 2 كۇمىس, 5 قولا مەدال الدى. بۇل تۋرالى Egemen.kz قر ءبىلىم جانە عىلىم مينيسترلىگىنىڭ ءباسپاسوز قىزمەتىنە سىلتەمە جاساپ حابارلايدى.
WorldSkills ستاندارتتارى بويىنشا ەۋرازيالىق چەمپيونات 7 ماۋسىم مەن 23 شىلدە ارالىعىندا ونلاين فورماتتا ءوتتى. قازاقستاندىق ستۋدەنتتەر رەسەي, قىتاي, ءۇندىستان, يران, ارمەنيا, بەلارۋس, وزبەكستان, قىرعىزستان جانە تاجىكستاننان كەلگەن قۇرداستارىمەن باسەكەگە ءتۇستى.
«بيىل ەۋرازيالىق چەمپيوناتتى ۇيىمداستىرۋعا قاتىسۋشى ەلدەردىڭ بارلىعى ات سالىستى. ولار الاڭدار جاساقتاپ, قاتىسۋشىلارعا قاجەتتى قۇرال-جابدىقتاردى ۇسىندى. ەۋرازيا چەمپيوناتىنىڭ ماقساتى – كادرلاردى دايارلاۋدا ۇلتتىق جۇيەلەردى ودان ءارى كەڭەيتۋ ءۇشىن جاڭا داعدىلار مەن تاجىريبە الماسۋ»,– دەپ اتاپ ءوتتى قر ءبىلىم جانە عىلىم مينيسترلىگى تەحنيكالىق جانە كاسىپتىك ءبىلىم دەپارتامەنتىنىڭ ديرەكتورى ناسىمجان وسپانوۆا.
ۇلتتىق قۇراما ەۋرازيا چەمپيوناتىنا 9 قۇزىرەتتىلىك بويىنشا قاتىستى. ناتيجەسىندە قازاقستاندىق ستۋدەنتتەر «ەلەكترومونتاجداۋ جۇمىستارى», «گرافيكالىق ديزاين», «شاشتاراز ونەرى», «سىلاۋ جانە دەكوراتيۆتىك جۇمىستار», «بيزنەسكە ارنالعان باعدارلامالىق شەشىمدەر», «كونديتەرلىك ءىس» جانە ء«سان تەحنولوگيالارى» سىندى 7 باعىت بويىنشا جۇلدەلى ورىندارعا يە بولدى.
ۇلتتىق قۇرامانىڭ ەۋرازيا چەمپيوناتىنا قاتىسۋى WorldSkills حالىقارالىق قوزعالىسىن دامىتۋ جانە ىلگەرىلەتۋ بويىنشا تاجىريبە الماسۋعا ىقپال ەتەدى. سونداي-اق كادرلاردى دايارلاۋداعى الەمدىك ترەندتەردى زەردەلەۋگە, وتاندىق تەحنيكالىق جانە كاسىپتىك ءبىلىم بەرۋ جۇيەسىنىڭ باسەكەگە قابىلەتتىلىگىن ارتىرۋعا مۇمكىندىك بەرەدى.
ايتا كەتەيىك, WorldSkills حالىقارالىق قوزعالىسىنىڭ ماقساتى – جۇمىسشى ماماندىقتاردى دارىپتەۋ جانە كادرلاردى كاسىبي دايارلاۋدىڭ ستاندارتتارىن ارتتىرۋ. قازاقستان WorldSkills قوزعالىسىنا 2014 جىلى قوسىلدى. سودان بەرى ۇلتتىق قۇراما حالىقارالىق جارىستارعا بەلسەنە قاتىسىپ جاتىر. جەتى جىل ىشىندە قازاقستان 50-ءشى ورىننان 14-ءشى ورىنعا كوتەرىلىپ, حالىقارالىق رەيتينگتەگى ورنىن نىعايتتى.