ەل تاۋەلسىزدىگىنىڭ 30 جىلدىعى قارساڭىندا كوكشەتاۋدا 5510 اسكەري ءبولىمىنىڭ پلاتسىندا جاس بۋىننىڭ اسكەري انتتى سالتاناتتى تۇردە قابىلداۋ ءراسىمى ءوتتى, دەپ حابارلايدى Egemen.kz اقمولا وبلىسىنىڭ ىشكى ساياسات باسقارماسىنا سىلتەمە جاساپ.
جىل سايىن قازاقستاننىڭ ءار وڭىرىنەن ۇلتتىق ۇلاننىڭ 5510 اسكەري ءبولىمىنىڭ قاتارىنا جاس جىگىتتەر وتان الدىنداعى قاسيەتتى بورىشتارىن ورىنداۋعا شاقىرىلادى.
اسكەري انتتى 200-دەن استام جاس جاۋىنگەر قابىلدادى. قولدانىستاعى كارانتيندىك شارالارعا بايلانىستى اسكەري انت بەرۋ ساربازداردىڭ تۋىستارى مەن جاقىندارىنىڭ قاتىسۋىنسىز ونلاين-رەجيمدە جۇرگىزىلدى.
جاس جاۋىنگەرلەردى اقمولا وبلىسى اكىمىنىڭ ورىنباسارى اينا ءمۇسرالىموۆا قۇتتىقتادى.
«بيىلعى جىلى بارلىق ءىس-شارالار ەلىمىزدىڭ تاۋەلسىزدىگىنىڭ 30 جىلدىعى اياسىندا وتكىزىلەتىنى بەلگىلى. مەرەيتويلى جىلدىڭ تاعى ءبىر جارقىن شاراسى - ءبىزدىڭ جاستارىمىزدىڭ قازاقستان رەسپۋبليكاسى قارۋلى كۇشتەرىنىڭ قاتارىنا كىرۋ سالتاناتى بولدى. تاۋەلسىزدىك جىلدارىندا قر قارۋلى كۇشتەرى كۇردەلى جولدان ءوتىپ, ءوز الەۋەتىن ايتارلىقتاي كۇشەيتتى. ءتۇرلى وزگەرىستەرگە ۇشىراپ, ءبىزدىڭ مىقتى ءارى جيناقى ارميامىز بۇگىندە مەملەكەتتى سىرتقى قاتەرلەردەن قورعاۋدىڭ, ەل ەگەمەندىگىن ساقتاۋدىڭ كەپىلىنە اينالدى. وتان قورعاۋشىلاردىڭ جاس ۇرپاعى وتانعا ادال قىزمەت ەتىپ, اسكەري جارعىلاردى لايىقتى ورىنداۋ ارقىلى قازاقستاننىڭ ۇلتتىق مۇددەلەرىن قورعاۋ قىزمەتىن ماقتانىشپەن اتقاراسىزدار دەپ ۇمىتتەنەمىز», دەدى ءوزىنىڭ قۇتتىقتاۋ سوزىندە اينا ءمۇسراليموۆا.
ءىس-شارا اياقتالعاننان كەيىن جاس جاۋىنگەرلەر سالتاناتتى مارشپەن ءوتىپ, ساپتىق دايارلىق ەلەمەنتتەرى مەن قويان-قولتىق ۇرىس تاسىلدەرى بويىنشا كورسەتىلىمدەردى كورسەتتى.