قازاقستان مەن ۇلىبريتانيا اراسىنداعى ستراتەگيالىق ارىپتەستىكتى دايەكتى تۇردە نىعايتۋعا دەگەن ءوزارا ۇمتىلىس قر پرەزيدەنتىنىڭ حالىقارالىق ىنتىماقتاستىق جونىندەگى ارنايى وكىلى ەرجان قازىحاننىڭ لوندونعا ساپارى بارىسىندا راستالدى, دەپ حابارلايدى Egemen.kz. بۇل تۋرالى قر ءسىم ءباسپاسوز قىزمەتى مالىمدەدى.
22-23 شىلدەدە وتكەن ساپار شەڭبەرىندە ەرجان قازىحان ۇلىبريتانيا پرەمەر-ءمينيسترىنىڭ قازاقستانداعى ساۋدا وكىلى بارونەسسا ەمما نيكولسونمەن, بۇۇ كليماتتىڭ وزگەرۋى جونىندەگى 26-شى كونفەرەنتسياسىنىڭ (سور26) ماسەلەلەرى جايىندا ورتالىق ازيا بويىنشا وڭىرلىك ەلشىسى دەۆيد مورانمەن, قازاقستانمەن ىنتىماقتاستىق جونىندەگى جالپىپارتيالىق پارلامەنتتىك توپتىڭ توراعاسى بوب ستيۋارتپەن, شىعىس ەۋروپا جانە ورتالىق ازيا ىستەرى جونىندەگى فورين-ءوفيسىنىڭ باسشىلىعىمەن, سونداي-اق بىرىككەن كورولدىك پارلامەنتىنىڭ قاۋىمدار پالاتاسى مەن لوردتار پالاتاسىنىڭ بىرقاتار دەپۋتاتتارىمەن كەزدەسۋلەر وتكىزدى.
كەزدەسۋ شەڭبەرىندە ەكىجاقتى جانە كوپجاقتى فورماتتاعى ىنتىماقتاستىقتىڭ وزەكتى ماسەلەلەرى, سونداي-اق الداعى ساپارلار, قازاقستاندىق دەلەگاتسيانىڭ بريتاندىق گلازگوداعى بۇۇ سور26 نەگىزگى كليماتتىق سامميتىنە قاتىسۋى, قازاقستان-بريتان ستراتەگيالىق ديالوگىنىڭ, ىسكەرلىك كەڭەسىنىڭ جانە ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسيانىڭ كەزەكتى وتىرىستارى تالقىلاندى.
ەرلان قازىحان بريتاندىق سەرىكتەستەردى قازاقستاندا جۇزەگە اسىرىلىپ جاتقان ساياسي جانە ەكونوميكالىق رەفورمالار باعدارلاماسىنىڭ قازىرگى دامۋ بارىسىمەن جانە ستراتەگيالىق باعىتىمەن تانىستىردى.
قازاقستاندىق ديپلومات قر پرەزيدەنتى ق.توقاەۆتىڭ وتاندىق ديپلومات پرەزيدەنت قاسىم-جومارت توقاەۆتىڭ, «حالىق ۇنىنە قۇلاق اساتىن مەملەكەت» تۇجىرىمداماسىنا سايكەس, ەلىمىزدەگى جاڭعىرتۋ وزگەرىستەرىن ودان ءارى جۇزەگە اسىرۋ باعىتىنان تايمايتىنىن ەرەكشە اتاپ ءوتتى.
بريتاندىق ارىپتەستەر قر باسشىلىعىنىڭ رەفورمالار باعدارلاماسىن جالعاستىرۋ جانە تەرەڭدەتۋ جونىندەگى جوسپارلارىن قۇپتاپ, ۇلىبريتانيانىڭ قازاقستانمەن ستراتەگيالىق ارىپتەستىكتى ودان ءارى دامىتۋعا دايىن ەكەنىن راستادى.
بريتاندىق تاراپ اعىلشىن قۇقىعىنىڭ قاعيداتتارى مەن نورمالارىنا سايكەس ارەكەت ەتەتىن «استانا» حالىقارالىق قارجى ورتالىعىنىڭ تابىستى دامۋى ەكى مەملەكەت اراسىنداعى ءتيىمدى ىنتىماقتاستىقتىڭ ماڭىزدى جەتىستىكتەرىنىڭ ءبىرى بولعانىن تىلگە تيەك ەتتى.
كەزدەسۋ سوڭىندا تاراپتار تالقىلانعان ماسەلەلەردىڭ اۋقىمدى كەشەنى بويىنشا ءوزارا تۇسىنىستىككە قول جەتكىزىپ, ساۋدا جانە ينۆەستيتسيالار, «جاسىل» ەنەرگەتيكا مەن كليماتتىق وزگەرىستەرگە قارسى كۇرەسۋ, ەكىجاقتى قاتىناستاردىڭ بارلىق سپەكترى بويىنشا ۇزاق مەرزىمدى سەرىكتەستىكتى ودان ءارى نىعايتۋعا نيەتتەرىن ءبىلدىردى.