الماتىدا 80 تۇرعىنعا 14 كۇندىك ءۇي كارانتينىن بۇزعانى ءۇشىن 30 اەك كولەمىندە ايىپپۇل سالىندى, دەپ جازادى Egemen.kz.
الماتى قالاسى سانيتارلىق-ەپيدەميولوگيالىق باقىلاۋ دەپارتامەنتىنىڭ مالىمدەۋىنشە, COVID-19-عا وڭ پتر تەستى بەرىلگەن قالا تۇرعىندارى قوعامدىق ورىنداردى ارالاپ, «ASHYQ»-پەن جۇمىس ىستەيتىن حالىققا قىزمەت كورسەتۋ ورتالىعى, مەيرامحانا, فيتنەس-ورتالىقتار, اۋەجاي جانە باسقا دا نىساندارعا كىرۋگە تىرىسقان.
ولاردىڭ قاتارىندا بانك, ۋنيۆەرسيتەت, ساۋدا, مەيرامحانا, ءبىلىم بەرۋ ۇيىمدارى, بايلانىس, زەينەتاقى قورلارى جانە باسقا دا مەكەمەلەردىڭ قىزمەتكەرلەرى بار. ولاردىڭ ءتىزىمى دەپارتامەنتتىڭ رەسمي سايتىندا جاريالاندى.
«سوندىقتان امبۋلاتوريالىق ەمدەلىپ جاتقان قالا تۇرعىندارىن ءوزىن-ءوزى وقشاۋلاۋ رەجيمىن بۇزباۋعا جانە قوعام الدىندا ازاماتتىق جاۋاپكەرشىلىك تانىتۋعا شاقىرامىز. ۆيرۋس جۇقتىرعان ادامدارمەن بايلانىستا بولعان تۇلعالار ءوزىن-ءوزى وقشاۋلاۋ رەجيمىن ساقتاۋى جانە باسقا ادامدارعا جۇقتىرماس ءۇشىن ادامدار كوپ جينالاتىن ورىندارعا بارماۋلارى ءتيىس», دەپ جازادى دەپارتامەنت.