دەنساۋلىق ساقتاۋ ءمينيسترى الەكسەي تسويدىڭ اقتوبەگە كەلگەن ساپارىندا ءوڭىردىڭ ەپيدەميالىق احۋالى جان-جاقتى تالقىلاندى. مينيستر رەنتگەن جابدىقتارىن شىعاراتىن «اقتوبەرەنتگەن» اق زاۋىتىندا, پەريناتالدى جانە ونكوگەماتولوگيا ورتالىقتارىندا بولىپ, №1 قالالىق ەمحانا جۇمىسىمەن تانىستى. جۇمىس ساپارىنىڭ سوڭىندا كوروناۆيرۋس ينفەكتسياسىمەن كۇرەس جونىندەگى رەسپۋبليكالىق شتابتىڭ وتىرىسىن وتكىزدى.
اقتوبە وبلىسى 9 شىلدەدەن باستاپ كوروناۆيرۋس ينفەكتسياسىنىڭ تارالۋى بويىنشا «قىزىل ايماقتىڭ» قاتارىندا تۇر. پاندەميا باستالعالى وڭىردە كۆي-مەن 14 142 ادام اۋىرىپ شىقتى. بۇگىندە قاۋىپتى ىندەتكە شالدىققان 2 490 ناۋقاستىڭ 503-ءى ستاتسيونارلىق, 1 987-ءى امبۋلاتۋرالىق رەجىمدە ەم الىپ جاتىر.
وسى جىلدىڭ باسىنان بەرى 294 جۇكتى ايەل كوروناۆيرۋس ينفەكتسياسىن جۇقتىرىپ دارىگەرلىك كومەككە جۇگىندى. بۇگىندە پروۆيزورلىق ورتالىقتا 57 جۇكتى كەلىنشەك جاتىر. ايتا كەتۋ كەرەك, بىلتىر ءسابي كۇتىپ جۇرگەن 15 كەلىنشەك وسى ىندەتتىڭ اسقىنۋىنان كوز جۇمعان بولاتىن.
«قىزىل ايماققا» ەنگەن كۇننەن باستاپ, ىندەتكە شالدىققاندار سانى ارتۋى مۇمكىن دەگەن بولجاممەن وڭىردە 24 ينفەكتسيالىق ستاتسيونار ازىرلەندى.
ء«دال قازىرگى كەزدە 18 ستاتسيوناردا ناۋقاستار ەم الىپ جاتسا, رەزەرۆتە 6-ۋى دايىن تۇر. وسى ينفەكتسيالىق ستاتسيونارلاردا دايىندالعان 3 603 كەرەۋەتتىڭ 401-ءى – رەانيماتسيالىق كەرەۋەتتەر. 18 شىلدەدە ءبىر تاۋلىكتە كۆي-مەن اۋىرعان 159 جاعداي, ال 21 شىلدەدە 192 جاعداي تىركەلدى (ونىڭ ىشىندە اۋرۋ سيمپتومدارى بار – 134)», دەدى وبلىستىق دەنساۋلىق ساقتاۋ باسقارماسىنىڭ باسشىسى رۇستەم يساەۆ.
سونداي-اق سوڭعى كۇننىڭ مالىمەتىنە قاراعاندا, شالقار, تەمىر, مۇعالجار اۋداندارىندا كوروناۆيرۋس جۇقتىرعاندار سانى ايتارلىقتاي كوبەيگەن. سونىڭ ىشىندە 18 جاسقا تولماعان 25 بالا وسى جۇقپالى ىندەتتىڭ قۇرىعىنا ءىلىنىپ, اۋرۋحاناعا جاتقىزىلدى.
ايتا كەتۋ كەرەك, وسى كۇنگە دەيىن اقتوبە وبلىسىنىڭ 206 مىڭ 280 تۇرعىنى كوروناۆيرۋسقا قارسى ەكپە الدى. مينيستر اقتوبە وبلىسىندا رەزەرۆتە تۇرعان كەرەۋەتتەردى شۇعىل تۇردە دايىنداپ, كەڭەس بەرۋ-دياگنوستيكالىق توپتىڭ جۇمىسىن جاساقتاپ, العاشقى جاردەم بەرۋ ورتالىقتارىندا احۋالدىق ورتالىقتار اشۋدى تاپسىردى.
اقتوبە وبلىسى