تۇتىنۋشى قۇقىعى قاي سالادا ءجيى بۇزىلادى؟

ساۋالناما ماقساتى – حالىقتىڭ كوڭىلىنەن شىعاتىن-شىقپايتىن قىزمەت تۇرلەرىن انىقتاۋ, سونداي-اق قازاقستاندىقتاردىڭ تۇتىنۋشى قۇقىعىن قانشالىقتى بىلەتىنىن سارالاۋ. شارا بارىسىندا رەسپوندەنتتەر ساۋدا مەن قىزمەتتىڭ 20 سالاسىن باعالادى.

ناتيجەسىندە ازاماتتاردىڭ تۇتىنۋشىلىق قۇقىعى ۇنەمى بۇزىلاتىن بەس سالا انىقتالدى.

بۇل تىزىمدە مەديتسينالىق قىزمەتتەر كوش باستاپ تۇر. تۇتىنۋشىلاردىڭ  45,9%-ى كورسەتىلەتىن قىزمەت ساپاسىنا قاناعاتتانبايدى. ەكىنشى سالا - تەمىرجول كولىگىنىڭ قىزمەتتەرى. وعان 43,2% رەسپوندەنتتىڭ كوڭىلى تولمايدى. ال قالاارالىق/حالىقارالىق اۆتوموبيل, ونىڭ ىشىندە تاكسي قىزمەتىنىڭ جۇمىسىن ادامداردىڭ 42%-ى ناشار دەپ بەلگىلەگەن. سونداي-اق ءبىلىم بەرۋ ورتالىقتارىنىڭ قىزمەتى 41,6% تۇتىنۋشىنىڭ ويىنان شىقپاعان. بەستىكتى بايلانىس قىزمەتى اياقتايدى. وعان رەسپوندەنتتەردىڭ 35,9%-ى قاناعاتتانبايدى.

تۋريستىك سالا, قوعامدىق تاماقتانۋ, تكش جانە باسقا دا سالالارعا قاتىستى شاعىمدار دا از ەمەس. تققك-گە قۇرىلىس ۇيىمدارىنىڭ اتىنا شاعىمدار تۇسكەن جوق. ولار قر يندۋستريا جانە ينفراقۇرىلىمدىق دامۋ مينيسترلىگىنىڭ قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنە تىكەلەي جىبەرىلەدى. ول قۇرىلىس سالاسىنىڭ بارلىق ماسەلەسىن قارايدى.

رەسپوندەنتتەردىڭ 67,5%-ى تۇتىنۋشى قۇقىعىن قورعاۋدى رەتتەۋ سالاسىندا ءبارى جاقساردى دەپ سانايدى.

زەرتتەۋ قورىتىندىسى بويىنشا كوميتەت بىرقاتار ۇسىنىس ازىرلەدى. اتاپ ايتقاندا, مەملەكەتتىك ورگاندارعا تۇتىنۋشى قۇقىعىن قورعاۋدىڭ بارلىق باعىتىندا ءتۇسىندىرۋ جۇمىسىن كۇشەيتۋ جانە مەكتەپ, كوللەدج, جوو-لاردا, تۇتىنۋشىلار اراسىندا تۇتىنۋشى ساۋاتتىلىعىن وقىتۋ ۇسىنىلدى.

ساۋالناما ناتيجەسى زاڭنامالىق رەفورمالاردى جالعاستىرۋ قاجەت ەكەنىن كورسەتتى. اتاپ ايتقاندا, 2021 جىلى «تۇتىنۋشىلاردىڭ قۇقىقتارىن قورعاۋ تۋرالى» زاڭعا تۇزەتۋلەردىڭ 2-پاكەتىن ازىرلەۋ باستالدى.

ايتا كەتەيىك, اتالعان ساۋالناما 2020 جىلعى شىلدە مەن قازان ارالىعىندا جۇرگىزىلگەن.