ءبىلىم جانە عىلىم مينيسترلىگىنىڭ ءباسپاسوز اقپاراتى بويىنشا ەكى جىل ىشىندە قازاقستاننىڭ جوعارى وقۋ ورىندارى 600-دەن استام جاڭا جانە 100-گە جۋىق يننوۆاتسيالىق ءبىلىم بەرۋ باعدارلامالارىن ەنگىزدى. مۇندا كادرلاردى دايارلاۋدا بۇرىن-سوڭدى جۇزەگە اسىرىلماعان باعدارلامالار مەن العاش رەت كىرىستىرىلىپ وتىرعان جوبالار بار. بۇل رەتتە ەلىمىزدە بالاماسى جوق جوبالاردى دا اتاپ وتكەن ءجون.
د.سەرىكباەۆ اتىنداعى شقتۋ-دە مۇنداي 32 باعدارلاما قاراستىرىلعان. بارلىعى قازاقستان ەكونوميكاسىن دامىتۋ جولىندا ەڭبەك ەتەتىن مامانداردى دايارلاۋعا باعىتتالعانى انىق. سونىڭ ءبىرى, بىرەگەيى – مەديتسينالىق ينجينيرينگ. ايتار بولساق, «مەديتسينالىق ينجينيرينگ» باعىتى بويىنشا ءبىلىم بەرۋ باعدارلاماسى د.سەرىكباەۆ اتىنداعى شىعىس قازاقستان تەحنيكالىق ۋنيۆەرسيتەتىندە 6ۆ07105 «اسپاپ جاساۋ» ماماندىعى شەڭبەرىندە باكالاۆرلاردى دايارلايدى.
وقۋ مەديتسينالىق تەحنيكالاردى وندىرۋمەن اينالىساتىن الەمدىك فيرمالاردىڭ باعدارلامالارى نەگىزىندە جۇرگىزىلەدى. ولاردىڭ مەتوديكالارى بىلىكتى, ءبىلىمدى ءارى سۇرانىسقا يە مامانداردى دايارلاۋعا ارنالعان. وقىتۋداعى ءادىس-تاسىلدەردىڭ ءوزى شەتەلدىك پروفەسسورلارمەن تىزە قوسا وتىرىپ جاسالدى.
ستۋدەنتتەردى دايارلاۋ كەزىندە ەلىمىزدە قولدانىلاتىن مەديتسينالىق تەحنيكالاردىڭ قۇرىلىسىن, قولدانۋ ەرەكشەلىكتەرىن, جۇمىس ىستەۋ پرينتسيپتەرىن كورسەتە وتىرىپ وقىتادى. اتاپ ايتقاندا, Siemens, Roche Diagnostics GmbH, Tem Innovations GmbH, Arkray, Iris, BST مەديتسينالىق تەحنيكالاردى پايدالانادى. قولدانىستاعى جابدىقتار تاجىريبە جيناقتاۋعا مول مۇمكىندىك بەرەدى.
ءسويتىپ وقۋدى تامامداعان تۇلەك جۇمىس تاجىريبەسىنە, جەكە جەتىستىكتەرىنە قاراي ينجەنەر, ينجەنەر-كونسترۋكتور, ينجەنەر زەرتحاناشى, جوندەۋ جونىندەگى ينجەنەر, ءوندىرىستى دايىنداۋ جونىندەگى ينجەنەر, مەترولوگ سىندى ماماندىقتاردى الىپ شىعادى. باكالاۆر بولىپ شىققان سوڭ «مەديتسينالىق ينجينيرينگ» بويىنشا شقتۋ ماگيستراتۋراسىندا وقۋىن جالعاستىرۋعا مۇمكىندىگى بار. پەداگوگيكالىق ءپروفيلدىڭ كاسىپتىك باعدارلاماسىن يگەرگەن جاعدايدا دوكتورانتۋراعا تۇسۋگە بولادى. مىنەكي, جاڭا ءادىستىڭ ءبىلىم الام دەۋشىلەرگە مۇمكىندىگى مول.