قر ساۋدا جانە ينتەگراتسيا مينيسترلىگى مەن Mastercard حالىقارالىق تولەم جۇيەسى قازاقستاندا كاسىپكەرلىكتى دامىتۋدىڭ نەگىزگى باعىتتارى بويىنشا بىرلەسكەن جۇمىس جاساۋ تۋرالى مەموراندۋمعا قول قويدى, دەپ حابارلايدى Egemen.kz.
بۇل مامىلە شوب-تىڭ تسيفرلىق جانە قارجىلىق ساۋاتتىلىعىن ارتتىرۋ, ەلەكتروندىق تولەمدەر مەن ەلەكتروندىق كوممەرتسيا قۇرالدارىنا قول جەتكىزۋ, تسيفرلىق تولەمدەر ينفراقۇرىلىمىن قۇرۋ جانە قازاقستاندىق شوب ءۇشىن ستارتاپتاردى جەدەلدەتۋ باعدارلامالارىن قولداۋدى كوزدەيدى.
قر ساۋدا جانە ينتەگراتسيا ۆيتسە-ءمينيسترى اسەل جاناسوۆا اتاپ وتكەندەي, 2025 جىلعا قاراي ساۋدانى دامىتۋدىڭ ۇلتتىق جوباسى اياسىندا قازاقستانداعى ەلەكتروندىق ساۋدا ۇلەسىنىڭ 15 پايىزعا دەيىنگى كورسەتكىشىنە قول جەتكىزۋ ماقساتى قويىلعان.
«وسى سەرىكتەستىك اياسىندا ىسكە اسىرىلاتىن بىرلەسكەن باستامالارىمىز ءبىزدىڭ كاسىپكەرلەرگە بيزنەستى تسيفرلاندىرۋ سالاسىنداعى جەتەكشى حالىقارالىق ساراپشىلار مەن مامانداردان قاجەتتى ءبىلىم مەن تاجىريبە الۋعا مۇمكىندىك بەرەدى دەپ ۇمىتتەنەمىز. بۇل ولارعا ساۋدا سالاسىندا جۇمىس ستراتەگياسىن وزگەرتۋگە, جاڭا فورماتتاردى, ستاندارتتى ەمەس شەشىمدەر مەن قىزمەتتەردى تابۋعا كومەكتەسەدى. ەلەكتروندىق ساۋدا ەلدەگى ەكونوميكانىڭ ءوسۋ درايۆەرلەرىنىڭ ءبىرى, سونداي-اق جاڭا جۇمىس ورىندارىنىڭ كوزى بولا الادى», دەيدى اسەل جاناسوۆا.
ءوز كەزەگىندە, ورتالىق ازياداعى Mastercard باس ديرەكتورى رافال ترەپكا قر ساۋدا جانە ينتەگراتسيا مينيسترلىگىمەن ىنتىماقتاستىق ورناتقانىمىزعا قۋانىشتى ەكەنىن جەتكىزدى.
«بۇل ستراتەگيالىق سەرىكتەستىك ءبىزدىڭ جاھاندىق مىندەتتەمەلەرىمىزگە سايكەس جۇزەگە اسىرىلادى. Mastercard شوب-تى قولداۋ ءۇشىن اۋقىمدى كەشەندى تۇتاس تاسىلدەمەنى قابىلدادى, بۇل قازىرگى ۋاقىتتا وزەكتى. ءبىز قر ساۋدا جانە ينتەگراتسيا مينيسترلىگىمەن ىنتىماقتاستىق ورناتقانىمىزعا قۋانىشتىمىز. ويتكەنى ۇكىمەتتىك ورگاندار ەكوجۇيەنى قولداۋ پروتسەسىندە ەرەكشە ءرول اتقارادى. ءبىزدىڭ بىرلەسكەن كۇش-جىگەرىمىز قازاقستان ەكونوميكاسىنا جانە بۇكىل قوعامعا پايدالى بولاتىنىنا سەنىمدىمىز», دەدى ورتالىق ازياداعى Mastercard باس ديرەكتورى رافال ترەپكا.
سەرىكتەستىك بيىلعى جىلدىڭ ءساۋىر ايىنان باستاپ تابىستى جۇرگىزىلىپ كەلە جاتقان ءبىلىم بەرۋ ۆەبينارلارىنىڭ سەرياسىن وتكىزۋ ارقىلى شوب-تىڭ تسيفرلىق جانە قارجىلىق ساۋاتتىلىعىن ىلگەرىلەتۋدى كوزدەيدى. «جارناما جانە تسيفرلىق جىلجىتۋ», «بيزنەستەن ەلەكتروندىق بيزنەسكە» جانە «ەلەكتروندىق تولەمدەر» تاقىرىپتارىندا ۆەبينارلار وتكىزىلدى. بولاشاق ۆەبينارلاردىڭ تاقىرىپتارى شوب سۇرانىستارى بويىنشا تاڭدالادى جانە بۇگىنگى كۇنى كاسىپكەرلەر الدىندا تۇرعان وزەكتى ماسەلەلەردى كورسەتەدى.
سەرىكتەستەر احقو فينتەح حابىمەن ارىپتەستىكتە SmartDuken (شوب ءۇشىن ەلەكتروندىق كوممەرتسيا مەكتەبى) پلاتفورماسىن ىسكە قوسۋدى جوسپارلاپ وتىر. SmartDuken – كاسىپكەرلەرگە ءوز بيزنەستەرىن ونلاين قۇرۋعا, دامىتۋعا جانە كەڭەيتۋگە كومەكتەسەتىن الاڭ. پلاتفورما شوب-قا تەگىن قولداۋ مەن كومەك كورسەتۋگە, سونداي-اق ءوز بيزنەسىن ونلاين رەجيمىنە كوشىرگىسى كەلەتىن جانە ونى جاڭا نارىقتارعا كەڭەيتكىسى كەلەتىن شوب ءۇشىن بيزنەس-اكسەلەراتسيانى ۇسىنۋعا باعىتتالعان. الاڭنىڭ ماقساتى – حالىقارالىق سەرىكتەستەردىڭ قاتىسۋىمەن بيزنەستى تسيفرلاندىرۋدىڭ باسىنان اياعىنا دەيىن پراكتيكالىق جول ارقىلى شوب-تى سۇيەمەلدەۋ جانە قاتىسۋشىلاردى ونلاين-فورماتتا بيزنەس جۇرگىزۋگە ۇيرەتۋ.
ىنتىماقتاستىق اياسىندا قازاقستاندا شوب تسيفرلاندىرۋ ءۇشىن Mastercard تولەم تەحنولوگيالارىن قولدانۋ مۇمكىندىگى, مىسالى, Card on File, Payment Gateway, Acceptance and Trade سياقتى شەشىمدەردى قوسا العاندا, زەردەلەنەتىن بولادى.
Start-up & Fintech Acceleration باعىتى بويىنشا Startup Weekend Central Asia-2021 بايقاۋلارىنىڭ قازىلار القاسىندا Mastercard تالىمگەر رەتىندە قاتىستى. سونداي-اق Mastercard احقو Fintech Hub جانە ينتەرنەت-باستامالاردى دامىتۋ قورىمەن (رەسەي) بىرلەسىپ, 2021 جىلعى شىلدەدە Astana Finance Days كونفەرەنتسياسىندا قازاقستاندا بانكتەر ءۇشىن العاشقى فينتەح-اكسەلەراتوردىڭ ىسكە قوسىلعانى تۋرالى حابارلادى.
قر ساۋدا جانە ينتەگراتسيا مينيسترلىگىنەن باسقا جوبالارعا «دامۋ» كاسىپكەرلىكتى دامىتۋ قورى, احقو فينتەح حابى, كاسىپكەرلىك پەن بيزنەس-ورتانى دامىتۋ بويىنشا USAID جوباسى, MOST بيزنەس-ينكۋباتورى, Yandex Direct, Ecwid, Robokassa كومپانيالارى جانە باسقا دا بىرقاتار سەرىكتەستەر قاتىستى.
ەكونوميكالىق ىنتىماقتاستىق جانە دامۋ ۇيىمىنىڭ (ەىدۇ) زەرتتەۋلەرىنە سايكەس, COVID-19 پاندەمياسى الەمدە ەلەكتروندىق ساۋدانىڭ كەڭ تارالۋىنا ىقپال ەتتى. جاڭا كاسىپورىندار قۇرىلۋدا, جاڭا كليەنتتىك تاجىريبە قالىپتاسۋدا, جاڭا ونىمدەر مەن قىزمەتتەر ۇسىنىلادى. قازاقستان حالىقارالىق قوعامداستىقتىڭ مۇشەسى رەتىندە دە جاھاندىق ترەندتەردەن تىس قالمايدى. قازاقستاندا ەلەكتروندىق ساۋدا 2020 جىلى ايتارلىقتاي دامىدى. الايدا, e-commerce-ءتىڭ تارالۋ دەڭگەيى ونشا جوعارى ەمەس جانە بيزنەس ءۇشىن پايدالانىلماعان مۇمكىندىكتەر كوپ.
الماتى