«ۆيتەبسك-2021» ەسترادالىق ءان ورىنداۋشىلاردىڭ حالىقارالىق بايقاۋىنىڭ ءبىرىنشى كۇنى ءوتتى. ول «سلاۆيان بازارى» ونەر فەستيۆالىنىڭ اجىراماس بولىگى, دەپ جازادى Egemen.kz Dimashnews.com سايتىنا سىلتەمە جاساپ.
«الەمدىك حيت» دەپ اتالاتىن بايقاۋدىڭ العاشقى كۇنىندە قاتىسۋشىلار الەمدىك دياگراممالاردا جەتەكشى ورىنعا يە بولعان تانىمال تۋىندىنى ورىندادى.
ءبىرىنشى بايقاۋ كۇنىنىڭ ناتيجەلەرى بويىنشا ەڭ كوپ ۇپاي سانىن ەكى قاتىسۋشى الدى. قازاقستاننىڭ وكىلى رۋحيا بايدۋكەنوۆا «Emotions» كومپوزيتسياسىمەن جانە سەربيادان كەلگەن قاتىسۋشى يرينا ارسەنيەۆيچ «I surrender» انىمەن 70 بالدىڭ 69 باللىن جينادى. كەشتى «Rise like a phoenix» انىمەن اشقان ۋكراينادان كەلگەن قاتىسۋشى رەناتا شتيفەل 64 ۇپايمەن كوشباسشىلار ۇشتىگىنە كىردى.
بايقاۋدىڭ ەكىنشى كۇنى 18 شىلدە كۇنى كەشكە وتەدى. وندا قاتىسۋشىلار سلاۆيان ەلىنىڭ كومپوزيتورلارىنىڭ ەسترادالىق ءانىن سلاۆيان تىلىندە وركەستردىڭ سۇيەمەلدەۋىمەن ورىندايدى.