نۇر-سۇلتاندا العاش رەت «NS street life» اتتى كوشە سپورتىنا ارنالعان كوليزەي مەن باقىلاۋ الاڭى اشىلدى. بۇل تۋرالى قالا اكىمى التاي كولگىنوۆ Instagram پاراقشاسىندا ءمالىم ەتتى, دەپ حابارلايدى Egemen.kz.
اكىمنىڭ ايتۋىنشا, نۇر-سۇلتاندا العاش رەت «NS street life» اتتى كوشە سپورتىنا ارنالعان كوليزەي اشىلعان. بۇل ەكى دەڭگەيلى مۋلتيفۋنكتسيونالدى ارەنا. مۇندا قالا تۇرعىندارى مەن قوناقتارى باسكەتبول, فۋتبول ويناپ, وسى سپورت تۇرلەرىنەن جارىستار, سول سياقتى بوكس جانە بي تۋرنيرلەرىن وتكىزە الادى. ەكىنشى قاباتتا كولەڭكەلى شاتىرلار ورنالاسقان.
نىسان الماتى اۋدانىندا مۇڭايتپاسوۆ كوشەسى مەن تاۋەلسىزدىك داڭعىلىنىڭ قيىلىسىندا (وتان قورعاۋشىلار الاڭى ماڭايى) ورنالاسقان.
بولاشاقتا كوليزەي جانىندا كونكي الاڭى اشىلادى.