«ۆيتەبسكىدەگى سلاۆيان بازارى» XXX حالىقارالىق ونەر فەستيۆالىنىڭ اشىلۋى قالانىڭ باستى الاڭى – جازعى امفيتەاتردا ءوتتى. وسى مادەني شارادا ديماش قۇدايبەرگەن «ليۋبوۆ پوحوجايا نا سون» جانە «Be With Me» اندەرىن جاندى داۋىستا ورىنداپ كورەرمەندەردى قۋانتتى, دەپ حابارلايدى Egemen.kz dimashnews.com سايتىنا سىلتەمە جاساپ.
مەرەيتويلىق فەستيۆالدى بەلارۋس پرەزيدەنتى الەكساندر لۋكاشەنكو اشتى.
«بۇگىنگى ۆيتەبسكىدەگى فەستيۆال – بۇل كاسىبي ۆوكالدىق شەبەرلىكتىڭ بەدەلدى حالىقارالىق بايقاۋى… بۇل ساحنا تايسيا پوۆالي, رۋسلانا, پەتر ەلفيموۆ, الەنا لانسكايا, ديماش قۇدايبەرگەن جانە باسقا دا كوپتەگەن تانىمال ارتىستەردىڭ جارقىن مانسابىنا باستاۋ بولدى», دەپ اتاپ ءوتتى پرەزيدەنت.
الەمنىڭ ءتۇرلى ەلدەرىنىڭ تانىمال ارتىستەرى مەن ۇجىمدارى اۋقىمدى حالىقارالىق ءىس-شاراعا قاتىستى. قوناقجاي امفيتەاتر زالى 7 مىڭ قوناق قابىلدادى.
كونتسەرت كەزىندە كورەرمەندەر ارتىستەردىڭ ۇسىنعان ءتۇرلى ستيلدەرى مەن جانرلاردىڭ كەرەمەت ۇيلەسىمىن تاڭدانىسپەن قابىلدادى: كلاسسيكالىق, حالىقتىق, ەسترادالىق مۋزىكا ۆيتەبسك ساحناسىندا شىرقالىپ, فەستيۆالدىڭ نەگىزگى يدەياسى – شىعارماشىلىقتىڭ شەكاراسى مەن قاشىقتىعى جوق ەكەنىن كورسەتتى. حورەوگرافيالىق, تسيرك, سپورت ۇجىمدارىنىڭ ونەر كورسەتۋى مەرەكەنىڭ سەرپىندى اتموسفەراسىن جانداندىردى.