داعدارىس ورتالىقتارىنا مونيتورينگ جۇرگىزىلەدى

مينيسترلىكتىڭ مالىمەتىنشە, 1 تامىزدان باستاپ «قازاقستاننىڭ تەڭ قۇقىقتار مەن تەڭ مۇمكىندىكتەر ينستيتۋتى» قوعامدىق قورىنىڭ ساراپشىلار توبى «داعدارىس ورتالىقتارىنىڭ قىزمەتىن جەتىلدىرۋ, وتباسىلىق-تۇرمىستىق زورلىق-زومبىلىقتىڭ الدىن الۋ جانە اگرەسسورلارمەن جۇمىس ىستەۋ جونىندەگى شارالاردى ازىرلەۋ جانە ىسكە اسىرۋ» الەۋمەتتىك جوباسى اياسىندا ەلىمىزدىڭ 17 وڭىرىندە باسپانالارعا مونيتورينگ جۇرگىزۋگە كىرىسەدى.

مونيتورينگ بارىسىندا ۇيىمداستىرۋشىلار تۇرمىستىق زورلىق-زومبىلىق قۇرباندارى ءۇشىن سالىنعان باسپانالاردىڭ, داعدارىس ورتالىقتارىنىڭ جۇمىس مودەلى قانشالىقتى ءتيىمدى, قاۋىپسىزدىك جۇيەسى ويلاستىرىلعان با, زارداپ شەككەندەر قانداي كومەك الا الادى دەگەن سۇراقتارعا جاۋاپ بەرۋى كەرەك.

«مونيتورينگتىڭ ماقساتى – باسپانالاردا, داعدارىس ورتالىقتارىندا قانداي جۇمىستار جۇرگىزىلىپ جاتقانىن, تۇرمىستىق زورلىق-زومبىلىق قۇرباندارىنا ارنايى قىزمەت كورسەتۋ ستاندارتى بويىنشا ولاردىڭ قانشالىقتى جۇمىس ىستەپ وتىرعانىن كورۋ. ارينە, ءبىز كورسەتىلەتىن قىزمەتتەردىڭ ساپاسىنا نازار اۋدارامىز. ول ءۇشىن ۆەبينارلار مەن ترەنينگتەر وتكىزدىك. ولاردىڭ نەگىزگى ماقساتى داعدارىس ورتالىقتارى ماماندارىنىڭ ءبىلىمى مەن داعدىلارىن ارتتىرۋ, تۇرمىستىق زورلىق-زومبىلىق قۇرباندارىنا ارنايى قىزمەت كورسەتۋدە كەيس-مەنەدجمەنت تەحنولوگياسىن قولدانۋدى ۇيرەتۋ بولدى», دەدى «قازاقستاننىڭ تەڭ قۇقىقتار مەن تەڭ مۇمكىندىكتەر ينستيتۋتى» قق پرەزيدەنتى مارگاريتا وسكەمباەۆا.

قر ەڭبەك جانە حالىقتى الەۋمەتتىك قورعاۋ مينيسترلىگىنىڭ دەرەكتەرىنە سايكەس 2021 جىلعى 1 ساۋىردەگى جاعداي بويىنشا ەلدە 29 باسپانا مەن داعدارىس ورتالىعى جۇمىس ىستەگەن.

«بىرنەشە اي ىشىندە ولاردىڭ سانى ارتا ءتۇستى. ونداعى قىزمەتتەردى مەملەكەتتىك ورگاندار عانا ەمەس, بارلىق وڭىرلەردەگى ۇەۇ-دا مەملەكەتتىك تاپسىرىس اياسىندا ۇسىنادى. باسپاناعا جانە زارداپ شەككەندەرگە جان-جاقتى كومەك كورسەتۋ قاجەتتىلىگى ايتارلىقتاي ارتۋدا», دەپ حابارلايدى قور وكىلدەرى.

قازاقستانداعى بۇۇ اگەنتتىكتەرى جۇرگىزگەن جەدەل باعالاۋ ناتيجەلەرى بويىنشا ءوزىن-ءوزى وقشاۋلاۋدىڭ سالدارىنان ۇيدەگى تيرانيا جاعدايلارى 50%-دان استام جيىلەگەن. 2020 جىلى 8 مىڭنان استام ادام اكىمشىلىك جاۋاپكەرشىلىككە تارتىلىپ, 79 مىڭعا جۋىعىنا قورعاۋ نۇسقاماسى تولتىرىلعان.

ايتا كەتسەك, جوبانى قر اقپارات جانە قوعامدىق دامۋ مينيسترلىگىنىڭ تاپسىرىسى بويىنشا جانە ازاماتتىق باستامالاردى قولداۋ ورتالىعىنىڭ مۇرىندىق بولۋىمەن «قازاقستاننىڭ تەڭ قۇقىقتار مەن تەڭ مۇمكىندىكتەر ينستيتۋتى» قق جۇزەگە اسىراتىن بولادى.