مۇعالىمدەر ساياباعى ابىلاي حان داڭعىلى مەن پۋشكين كوشەسى قيىلىسىندا ورنالاسقان بەلاسار كوپىرىنىڭ ماڭى اقبۇلاق وزەنى بويىندا سالىنىپ جاتىر. بۇل تۋرالى قالا اكىمدىگىنىڭ رەسمي سايتى حابارلادى, دەپ جازادى Egemen.kz.
پاركتىڭ اۋدانى - 1,2 گەكتار. قولدانىستاعى ساياباقتى قايتا قۇرۋ جانە ل.ن. گۋميلەۆ اتىنداعى ەۇۋ-عا جاقىن ەكەنىن ەسكەرە وتىرىپ, دەمالۋعا ارنالعان تىنىش ورىندار, سەرۋەندەۋ جانە وقۋ ورىندارىن قۇرۋ جوسپارلانۋدا.
«Ustaz alany» ساياباعى مۇعالىمدەرگە ارنالعان. ونىڭ ايرىقشا ەرەكشەلىگى – شاعىن ساۋلەت نىساندارىندا. ماسەلەن, ءار ورىندىققا مۇعالىمنىڭ اتى-ءجونى مەن شاعىن ءومىربايانى جازىلعان تاقتايشا ورناتىلادى. سونىمەن قاتار پەداگوگتەرگە ەرەن ەڭبەگى ءۇشىن العىس رەتىندە گريفەل قابىرعاسى مەن «Bilim japyraqtary» ينستاللياتسياسىن ورناتۋ جوسپارلانىپ وتىر», دەدى نۇر-سۇلتان قالاسىنىڭ ساۋلەت, قالا قۇرىلىسى جانە جەر قاتىناستارى باسقارماسىنىڭ باسشىسى نۇرلان ۇرانحاەۆ.
ساياباق اۋماعىندا الماسىپ وقۋ ءۇشىن كىتاپ قوراپتارىن ورناتۋ جوسپارلانىپ وتىر. سونىمەن قاتار ساياباقتىڭ ورتالىق بولىگىندە تازا اۋادا شەبەرلىك ساباقتارىن وتكىزۋگە ارنالعان ورىن اشىلادى. ەلوردانىڭ ديزاين-كودىنا سايكەس جارىقتاندىرىلعان اتكەنشەك ورىندىقتارى مەن بيىك شامدار (تورشەر) اللەيانى اسەمدەي تۇسەدى. كوگالداندىرۋعا دا ەرەكشە كوڭىل بولىنبەك. ال ساياباقتىڭ ورتالىق بولىگىنە ەمەن وتىرعىزۋ جوسپارلانعان.
«بۇل ساياباق اقبۇلاق وزەنىنىڭ جانىندا ورنالاسقاندىقتان, تەڭىز كەيپىندەگى بالالار الاڭقايى ورناتىلادى. بۇدان بولەك ەرەكشە شاتىرلارى بار الاڭ اشىلادى», دەدى ۋربانيستيكا ورتالىعىنىڭ باسشىسى ەلنار بازىكەن.
ساياباقتىڭ جاعاسىنا سارعىش رەڭ بەرەتىن جارىق پەن گيرلياندالار ورناتۋ جوسپارلانۋدا. «ادامعا ىڭعايلى قالا» يدەياسىن ىسكە اسىرۋ اياسىندا كەدەرگىسىز ورتا قۇرىلادى.
ەستەرىڭىزگە سالا كەتەيىك, بيىل ەلوردا اكىمى التاي كولگىنوۆتىڭ تاپسىرماسى بويىنشا «نۇر-سۇلتان – جايلى قالا» ماستەر-جوسپارى اياسىندا 190-عا جۋىق اۋلا مەن قوعامدىق كەڭىستىكتى اباتتاندىرۋ جوسپارلانىپ وتىر.
وتكەن جىلى 210 اۋلا مەن قوعامدىق كەڭىستىك اباتتاندىرىلعان بولاتىن.