قر ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ قازاقستاندىق فەرمەرلەر سۋمەن قالاي قامتاماسىز ەتىلەتىنىن ايتتى, دەپ حابارلايدى Egemen.kz.
«فەرمەرلەردى سۋمەن قامتاماسىز ەتۋ ماقساتىندا ءبىز كەلەسى جۇمىستاردىڭ جۇرگىزىلۋىن جوسپارلادىق. بىرىنشىدەن, كورشى ەلدەرمەن قارىم-قاتىناس ورناتۋ. سىرداريا وزەنى بويىنشا ءبىز قىرعىز ەلىمەن قوسىمشا سۋ اعىزۋ تۋرالى كەلىسىمگە كەلدىك. ۆەگەتاتسيا شىڭىندا توقتوعۇل سۋ قويماسىنان قوسىمشا 330 ميلليون تەكشە مەتر سۋ قورى بولادى. ءدال وسىنداي سۋ كولەمىن وزبەكستان اۋماعى ارقىلى وتكىزۋ تۋرالى دا ۋاعدالاستىققا قول جەتكىزدىك. تاجىك جانە وزبەك تاراپتارىمەن بىرلەسىپ, بيىل 16 ماۋسىمدا «باحري توچيك» سۋ قويماسىنىڭ جۇمىس رەجيمىن كەلىسۋ بويىنشا ماۋسىم-تامىز كەزەڭىنە ارنالعان جۇمىس كەڭەسىنىڭ حاتتاماسىنا قول قويىلدى», دەدى ماعزۇم مىرزاعاليەۆ.
ءمينيستردىڭ ايتۋىنشا, بۇگىندە كوللەكتورلىق-درەناجدىق سۋلاردى قايتا پايدالانۋ تاجىريبەسى قولعا الىندى. سوعان بايلانىستى ارنالاردى مەحانيكالىق تازارتۋ جۇمىستارى جۇرگىزىلىپ, ەگىندى سۋارۋدىڭ كەستەسى ازىرلەندى.
«جايىق وزەنى بويىنشا وسى جىلدىڭ ماۋسىم ايىندا ورىنبور قالاسىندا سۋ شارۋاشىلىعى ۇيىمدارىنىڭ كەزدەسۋى ءوتتى. وندا جايىق وزەنى باسسەينىندەگى سۋ شارۋاشىلىعى جاعدايى تالقىلاندى. كەزدەسۋ قورىتىندىسى بويىنشا الداعى جاز-كۇز مەزگىلىنە ارنالعان يريكلين سۋ قويماسىنىڭ جۇمىس رەجيمى بەكىتىلدى. ودان بولەك, بيىل اقپان-ناۋرىز ايلارىندا ءبىز اۋىل شارۋاشىلىعى مينيسترلىگىمەن وڭىرلەرگە بارىپ جينالىستار وتكىزدىك. قالىپتاسىپ وتىرعان سۋ شارۋاشىلىعى جاعدايىن تالقىلاپ, سۋدى كوپ قاجەت ەتەتىن داقىلداردىڭ ەگىستىگىن ازايتۋدى ۇسىندىق», دەدى مينيستر.