ورالدا مۇعالىم كوروناۆيرۋسقا قارسى ۆاكتسينانى راستايتىن تولقۇجاتتى قولدان جاساتتى دەگەن كۇدىككە ءىلىندى, دەپ حابارلايدى Egemen.kz موي گورود پورتالىنا سىلتەمە جاساپ.
باتىس قازاقستان وبلىستىق پوليتسيا دەپارتامەنتى ءباسپاسوز قىزمەتىنىڭ اقپاراتىنشا, وبلىس ورتالىعى مەكتەپتەرىنىڭ بىرىندە جۇمىس ىستەيتىن 37 جاستاعى مۇعالىم ماۋسىمنىڭ 5-15 ارالىعىندا COVID-19 ۆيرۋسىنا قارسى ۆاكتسينا تۋرالى جالعان پاسپورت جاساتقان.
«اتالعان فاكتى بويىنشا قر قىلمىستىق كودەكسىنىڭ 385-بابىمەن (قۇجاتتاردى جالعان جاساتۋ, دايىنداۋ نەمەسە ساتۋ) سوت الدىنداعى تەرگەپ-تەكسەرۋ جۇمىستارى باستالدى», دەدى پوليتسيا وكىلدەرى.
بۇل رەتتە ءتارتىپ ساقشىلارى جالعان قۇجاتقا دارىگەرلەردىڭ قاتىسىنىڭ بار-جوعىن ناقتىلاعان جوق.