2021 جىلدىڭ قاڭتار مەن مامىر ارالىعىندا ادام ساۋداسىنا قاتىستى 63 قىلمىس تىركەلدى, دەپ حابارلايدى Egemen.kz پورتالى ranking.kz-كە سىلتەمە جاساپ.
«قىلمىستاردىڭ كوبى جەزوكشەلىك نەمەسە جەڭگەتايلىققا قاتىستى اشىلعان پريتوندارمەن بايلانىستى. ءبىر جىل بۇرىن ءدال سونداي 20 قىلمىس تىركەلسە, بيىل 35 جاعداي انىقتالعان. ياعني ءبىر جىلدا 75 پايىزعا كوبەيگەن. سونداي-اق جاسوسپىرىمدەردى ساتۋدىڭ 8 جاعدايى, جاسوسپىرىمدەردى جەزوكشەلىككە تارتۋدىڭ 7 وقيعاسى, ادام ساۋداسى مەن جەزوكشەلىككە تارتۋدىڭ 6 جاعدايى, ەڭبەگىن پايدالانۋمەن باس بوستاندىعىن شەكتەۋدىڭ 1 جاعدايى تىركەلدى», دەلىنگەن زەرتتەۋدە.
وسى جىلدىڭ العاشقى بەس ايىندا جاسوسپىرىمدەردى ساۋدالاۋعا قاتىستى 25 ادام, جەزوكشەلىك نەمەسە جەڭگەتايلىققا قاتىستى پريتون ۇيىمداستىرعانى ءۇشىن 6 ادام, ادام ساۋداسىنا قاتىستى 4 ادام قىلمىستىق جاۋاپكەرشىلىككە تارتىلعان.
ادام ساۋداسىنا قاتىستى قىلمىستارعا كىنالى ادامداردىڭ كوپشىلىگى – جۇمىسسىزدار. بۇۇ ەسىرتكى جانە قىلمىستار جونىندەگى باسقارماسىنىڭ مالىمەتتەرىنە سۇيەنسەك, ورتالىق ازيا مەن شىعىس ەۋروپا ەلدەرىندە ادام ساۋداسىنا قاتىستى زارداپ شەككەندەردىڭ 66 پايىزى ءماجبۇرلى ەڭبەككە تارتىلسا, 23 پايىزى سەكسۋالدى ەكسپلۋاتاتسياعا تۇسكەندەر. ورتالىق ازيا ەلدەرىندە زارداپ شەككەندەردىڭ كوبى ايەلدەر (55 پايىز). ال ەرلەردىڭ ۇلەسى 32 پايىزدى قۇرايدى. تاعى 8 پايىزى ۇلدار بولسا, 5 پايىزى ءجاسوسپىرىم قىزدار.
قر ءسىم-ءنىڭ مالىمەتىنە سۇيەنسەك, قازاقستان ەكىنشى ساناتتاعى ەلدەردىڭ (Tier 2) «باقىلاۋ تىزىمىنەن» ادام ساۋداسى تۋرالى جاھاندىق بايانداماعا قوسىلعان. مينيسترلىك وسىعان بايلانىستى بۇل سالادا ادام قۇقىعىن قورعاۋدىڭ كورسەتكىشى جاقسارعانىن حابارلايدى.