قازاقستاندا ءبىلىم بەرۋ گرانتتارىن تاعايىنداۋ كونكۋرسىنا قاتىسۋ ءۇشىن قۇجاتتار قابىلداۋ 16 شىلدە كۇنى باستالادى. پاندەميا جاعدايىنا بايلانىستى قۇجات قابىلداۋ ەلەكتروندى فورماتتا جۇزەگە اسىرىلادى.
ءبىلىم جانە عىلىم مينيسترلىگىنىڭ حابارلاۋىنشا, وقۋعا تۇسۋشىلەر 6 مامىر مەن 1 شىلدە ارالىعىندا وتكەن ۇبت-نىڭ ەكى ناتيجەسىنىڭ بىرەۋىن كونكۋرسقا ۇسىنا الادى. ءوتىنىش بەرگەن كەزدە تالاپكەرلەر اتتەستات, اتتەستاتقا قوسىمشانىڭ ەلەكتروندى كوشىرمەلەرىن جانە ەلەكتروندى تۇردە كولەمى 3ح4 فوتوسۋرەتتى, سونداي-اق باسقا دا قۇجاتتىڭ كوشىرمەلەرىن قوسا تاپسىرۋى قاجەت.
ەگەر تالاپكەر «التىن بەلگى» يەگەرى نەمەسە وتانسۇيگىشتىك جانە بەلسەندى ازاماتتىق ۇستانىمى ءۇشىن ەرەكشەلىك بەل-گىسىمەن ماراپاتتالعان بولسا, وندا ول باسقا ۇمىتكەرلەرمەن بالدارى تەڭ بولعان جاعدايدا باسىم قۇقىققا يە بولادى. وليمپيادالار مەن سپورتتىق جارىستاردىڭ جەڭىمپازدارى ءۇشىن دە وسىنداي ارتىقشىلىقتار قاراستىرىلعان. تالاپكەرلەردىڭ مۇنداي جەتىستىكتەرىنىڭ ەسكەرىلۋى ءۇشىن قۇجاتتاردى تاپسىرۋ كەزىندە راستايتىن قۇجاتتاردىڭ كوشىرمەلەرىن تىركەۋ قاجەت. شەت ءتىلىن مەڭگەرگەنىن راستايتىن حالىقارالىق سەرتيفيكات بولعان كەزدە ءوتىنىش بەرۋشى سەرتيفيكاتتىڭ اتاۋىن, بالىن كورسەتەدى جانە ەلەكتروندى سەرتيفيكاتتى تىركەيدى.
سونىمەن قاتار بيىل ءبىلىم بەرۋ گرانتتارىن ءبولۋ كەزىندە ءبىلىم جانە عىلىم مينيسترلىگى العاش رەت حالىقتىڭ الەۋمەتتىك وسال توپتارىنا كۆوتالار ءبولدى. ەندى كوپبالالى نەمەسە تولىق ەمەس وتباسىلاردان شىققان بالالار, سونداي-اق ەرەكشە قاجەتتىلىكتەرى بار بالالاردى تاربيەلەپ وتىرعان وتباسىلارداعى تالاپكەرلەردىڭ گرانت الۋ مۇمكىندىكتەرى جوعارىلاي ءتۇستى.
كامەلەتكە تولماعان ءتورت جانە ودان كوپبالا تاربيەلەپ وتىرعان وتباسىلارداعى بالالار ءۇشىن گرانتتاردىڭ جالپى سانىنىڭ 5%-ى, كەمىندە ءۇش جىل تولىق ەمەس وتباسى مارتەبەسى بار وتباسىلاردان شىققان بالالارعا 1%-ى, ءى, ءىى توپتاعى مۇگەدەك بالالاردى تاربيەلەپ وتىرعان وتباسىلاردان شىققان تۇلەكتەرگە ءبىلىم بەرۋ گرانتتارىنىڭ 1%-ى قاراستىرىلعان.
ۇبت قورىتىندىسى بويىنشا كەمىندە 65 بالل جيناعان تالاپكەرلەر ۇلتتىق جوعارى وقۋ ورىندارىنا تۇسە الادى. «پەداگوگيكالىق عىلىمدار» – كەمىندە 75 بالل, «دەنساۋلىق ساقتاۋ» − كەمىندە 70 بالل, «اۋىل شارۋاشىلىعى جانە بيورەسۋرستار», «ۆەتەريناريا» – كەمىندە 60 بالل, باسقا جوعارى وقۋ ورىندارىنا – كەمىندە 50 بالل. بۇل رەتتە ۇبت-نىڭ ءاربىر ءپانى نەمەسە شىعارماشىلىق ەمتيحان بويىنشا كەمىندە 5 بالل جيناۋ قاجەت.
تالاپكەرلەر مەن ولاردىڭ اتا-انالارىنىڭ دەنساۋلىعىن قورعاۋ ماقساتىندا جوعارى وقۋ ورىندارىندا ۆيرتۋالدىق قابىلداۋ كوميسسيالارى جۇمىس ىستەپ, تالاپكەرلەرگە بەينە بايلانىس ارقىلى كەڭەس بەرەدى. بۇل ءارى قۇجات قابىلداۋ پروتسەسىن دە جەدەلدەتەدى.