بريتاندىق ميللياردەر ريچارد برەنسون The Sunday Times باسىلىمىنا بەرگەن سۇحباتىندا SpaceX كومپانياسىنىڭ نەگىزىن قالاۋشى جانە باس اتقارۋشى ديرەكتورى يلون ماسك Virgin Galactic عارىش كەمەسىنىڭ كەزەكتى ۇشىرىلىمدارىنىڭ بىرىنە تاپسىرىس بەرگەنىن راستادى, دەپ حابارلايدى Egemen.kz.
يلون ماسك ريچارد برەنسوننىڭ جاقىن دوسى ەكەنىن, سونداي-اق SpaceX كەمەسىمەن عارىشقا اتتاناتىنىن دا اتاپ ءوتتى.
الايدا يلون ماسكتىڭ Virgin Galactic كەمەسىمەن عارىشقا قاشان ۇشاتىنى ءالى بەلگىسىز. The Wall Street Journal گازەتىنىڭ حابارلاۋىنشا, كەمەدە ءبىر ورىن 250 000 دوللارعا ۇسىنىلعان. بۇل جاعدايدا جولاۋشىلار ءتورت مينۋت ىشىندە نولدىك اۋىرلىقتا بولادى.
ەسكە سالايىق, 11 شىلدە كۇنى Virgin Galactic ءوزىنىڭ Unity-22 عارىش كەمەسىن ريچارد برەنسونمەن جانە باسقا دا بىرنەشە عارىشكەرلەرمەن ءساتتى ۇشىرىپ, سودان كەيىن نيۋ-مەكسيكاداعى Spaceport America-عا قونعانىن مالىمدەدى.
يلون ماسك پەن دجەفف بەزوس ريچارد برەنسوندى عارىشقا ءساتتى ۇشۋىمەن قۇتتىقتادى, دەگەنمەن بەزوستىڭ Blue Origin كومپانياسى بۇرىن بۇل رەيستى عارىش دەپ مويىندامايتىنىن ايتقان, ويتكەنى Virgin Galactic عارىش كەمەسى 86 شاقىرىم بيىكتىككە كوتەرىلدى, ال «عارىش شەكاراسى» (كارمان سىزىعى) 100 شاقىرىم بيىكتىكتەن باستالادى.