پاۆلوداردا «قايىرىمدى ىستەر مارافونى» جالپىۇلتتىق جوباسى اياسىندا «مەنىڭ تازا الەمىم» چەللەندجى باستالدى, دەپ حابارلايدى Egemen.kz.
جوبانى «ARCUS» دامۋ ورتالىعى مەن «الرامي» مەنتالدى اۋىتقۋلارى بار تۇلعالارعا ارنالعان قوعامدىق بىرلەستىك كلۋب ءۇيى ۇيىمداستىرعان.
چەللەندجدى 30-دان استام ادام قولدادى. ولاردىڭ ىشىندە «الرامي» كلۋب ءۇيى مەن «ARCUS» دامۋ ورتالىعىنىڭ مۇشەلەرى, «قازاقستان ءاليۋمينيى» اق جانە «جاسىل ەل» جاستار جاساقتارىنىڭ ەرىكتىلەرى, بەلسەندىلەر, مەنتالدى اۋىتقۋلارى بار ادامدار جانە ەكولوگيا ماسەلەلەرىنە بەي-جاي ەمەس ازاماتتار بار. قاتىسۋشىلار ەرتىس وزەنىنىڭ جاعالاۋىن تازالاپ, 40 قاپ قوقىس جينادى.
«العاش رەت مۇنداي سەنبىلىكتى ءبىز 2019 جىلى وتكىزدىك, سودان بەرى بۇل ءبىز ءۇشىن جاقسى داستۇرگە اينالدى. ءبىز مىندەتتى تۇردە چەللەندجىمىزدى جالعاستىرامىز جانە الداعى ۋاقىتتا الەۋمەتتىك جەلىلەردە سەنبىلىكتەر تۋرالى اقپارات جاريالايتىن بولامىز. بارلىق نيەت بىلدىرۋشىلەر بىزبەن بىرگە قاتىسا الادى. تابيعاتتى باعالايىق جانە بۇلدىرمەيىك! ويتكەنى, بۇل ءبىزدىڭ دەنساۋلىعىمىز بەن بولاشاق ۇرپاقتىڭ دەنساۋلىعى!», دەدى «ARCUS» دامۋ ورتالىعىنىڭ جەتەكشىسى الينا باتارەەۆا.
ۇيىمداستىرۋشىلاردىڭ ايتۋىنشا, بۇل اكتسيا حالىقتىڭ ەكولوگيالىق مادەنيەتىن قالىپتاستىرۋمەن قاتار, پسيحونەۆرولوگيالىق اۋرۋلارى بار ادامداردىڭ الەۋمەتتەنۋىنە ىقپال ەتەدى.
ايتا كەتسەك, اعىمداعى جىلدىڭ 24 شىلدەسىندە ءار وڭىردە جارتاستار مەن سۋ ايدىندارىن تازارتۋ بويىنشا اۋقىمدى ەكواكتسيالار وتەدى جانە ولارعا كەز كەلگەن ادام قوسىلا الادى.
مارافونعا #قايىرىمدىىستەرمارافونى #مارافوندوبرىحدەل رەسمي حەشتەگتەرىمەن الەۋمەتتىك جەلىلەردە ءوز يگى ىستەرىمەن بولىسە وتىرىپ, كەز كەلگەن ادام قوسىلا الادى.