وسكەمەن ايالدامالارىندا سارىلىپ اۆتوبۋس كۇتەتىن ۋاقىتىڭىزدى بوسقا جىبەرمەۋ ءۇشىن ورالحان بوكەيدىڭ شىعارمالارىن وقي وتىرۋىڭىزعا بولادى. «...مارە-سارە قالانىڭ تىرشىلىگىنە ارالاستىم. ءبارىبىر اۋىلدىڭ اق نيەتتى ابزال جاندارىن ۇمىتپا المادىم. ۇمىتۋ قيىن دا عوي...» دەۋشى ەدى جازۋشى.
ايتقانداي, ورالحاننىڭ شىعارمالارىنا باس قويساڭىز, قالانىڭ قاۋىرت تىرشىلىگىن ءبىر ساتكە ۇمىتىپ, اۋىلدىڭ كەڭ كوشەسىن كەزىپ جۇرگەندەي كۇيدە بولاسىز. ەندى وسكەمەندىكتەر جازۋشى شىعارمالارىن ايالدامادا تۇرىپ-اق وقۋلارىنا بولادى. ناقتىراق ايتساق, ەرتىستى جاعالاي جاتقان ە.پ.سلاۆسكي كوشەسىندەگى ايالدامالار كىتاپحانا ۇلگىسىندە قايتا جاسالدى. ايالداماداعى كورنەكىلىك تاقتاسىندا كورسەتىلگەن QR-كود ارقىلى ورالحان بوكەيدىڭ شىعارمالارىن تاڭداپ الىپ, وقي بەرەسىز. بۇل يگى باستاماعا قالا تۇرعىندارى ريزا.
– كىمنىڭ ويىنا كەلسە دە, دۇرىس باستاما بولدى. ايالدامادا بوسقا تەلەفونعا تەلمىرگەنشە, ونلاين بولسىن اڭگىمە وقىپ تۇرۋعا بولادى. ونىڭ ۇستىنە, وسكەمەندە اۆتوبۋستار سيرەك جۇرەدى. كەرەك باعىتىڭ كەلگەنشە, ءبىر كىتاپتى اۋدارىپ تاستاۋعا بولادى, – دەيدى ءازىل-شىنىن ارالاستىرا پىكىر بىلدىرگەن نازەركە توقانوۆا.
ۇيالى تەلەفوندا اقپارات جەتىپ ارتىلادى. كەرەگىنەن كەرەكسىزى كوپ-اۋ. تۇرعىندار قاۋىزى بار, ءدانى جوق جازبالاردى ساناسىنا سىڭىرگەنشە, جازۋشىنىڭ جان دۇنيەسىنە ءۇڭىلىپ, رۋحاني ازىق تاپقانى الدەقايدا ءتيىمدى ەمەس پە؟! ايتەۋىر تەلەفونعا تاۋەلدى ەكەنبىز, ىشىنەن از دا بولسا كەرەك دۇنيە الۋعا تالپىنعان ءجون. ورالحان بوكەي اتىنداعى كىتاپحانا باسشىلىعىنىڭ ايتۋىنشا, بۇل باستاما ءالى دە جالعاسىن تابا بەرمەك.
وسكەمەن