ۇقك شەكارا قىزمەتى الماتى وبلىسى بويىنشا دەپارتامەنتىنىڭ قاراساي اۋدانى بويىنشا شەكارا باسقارماسىنا قاراستى «ساتى» شەكارا بولىمشەسىنىڭ اۋماعىندا قىزىل كىتاپقا ەنگەن وسىمدىكتى زاڭسىز جيناعان ازاماتتار قولعا ءتۇستى, دەپ حابارلايدى Egemen.kz.
سونداي-اق شەكارا ناريادى وسىمدىكتەرمەن بىرگە ءۇش دانا ۇلاردى تاۋىپ تاركىلەدى.
«قوس وقيعا دا 8 شىلدە كۇنى ورىن العان. الدىن الا كەلىپ تۇسكەن اقپاراتقا ساي ارەكەت ەتكەن شەكاراشىلار تۇنگى ساعات 12:40 شاماسىندا جالاڭاش-العاباس تاسجولىنىڭ بويىندا قازاقستان رەسپۋبليكاسىنىڭ قوس ازاماتى مىنگەن كولىكتى توقتاتقان. جەڭىل كولىكتى ءتىنتۋ ناتيجەسىندە ىشىنە بەلگىسىز وسىمدىكتەر سالىنعان 30 قاپشىق تابىلىپ, تاركىلەندى. سالماعى شامامەن 300 كەلىنى تارتادى. كەيىننەن بەلگىلى بولعانداي, بۇل – ەلىمىزدىڭ قىزىل كىتابىنا ەنگەن «ماكراتوني كراسياچايا» دەپ اتالاتىن وسىمدىك بولىپ شىقتى», دەيدى ۇقك شەكارا قىزمەتىنىڭ زاپاستاعى پودپولكوۆنيگى تامارا داۋلەتباەۆا.
سونىمەن قاتار كولىكتەن ءۇش ۇلار تابىلعان. ولار وزدەرىنىڭ زاڭسىز ارەكەتتەرىن «ساتى» شەكارا بولىمشەسىنىڭ ۋچاسكەسىندەگى مەملەكەتتىك شەكارادان 20 شاقىرىم جەردەگى دالاشىق دەپ اتالاتىن اۋماقتا ىسكە اسىرعان. قولعا تۇسكەندەردىڭ ءبىرى شەكاراشىلارعا قارسىلىق تانىتىپ, قاشۋعا تىرىسقان.
ء«دال سول كۇنى كەشكى التىلاردىڭ كەزىندە شەكارا ناريادى «كولساي كولدەرى» مەملەكەتتىك ۇلتتىق ساياباعىنىڭ قىزمەتكەرلەرىمەن بىرلەسىپ, جىڭىشكە شاتقالىنىڭ بويىنان ءتورت ازاماتتى ۇستادى. شەكاراشىلارعا وزدەرىنىڭ جەكە باستارىن كۋالاندىراتىن قۇجاتتارىن كورسەتە الماعان ازاماتتاردىڭ كولىگىنەن دە قىزىل كىتاپقا ەنگەن وسىمدىكتىڭ ءتۇرى سالىنعان بەس قاپشىق تابىلىپ, تاركىلەندى», دەيدى تامارا داۋلەتباەۆا.
قازىرگى ساتتە شەكارا ايماعىندا قۇرىقتالعان ازاماتتار «جالاڭاش» شەكارا بولىمشەسىنە جەتكىزىلىپ, تەكسەرۋ جۇمىستارى باستالدى.