ەلوردا كۇنى مەن تاۋەلسىزدىكتىڭ 30 جىلدىعى قارساڭىندا نۇر-سۇلتاندا قۇتقارۋشىلار ساياباعى اشىلدى دەپ حابارلايدى Egemen.kz.
قۇتقارۋشىلار ساياباعىنىڭ اشىلۋ سالتاناتىنا ەلوردا اكىمى التاي كولگىنوۆ, قر تج ءمينيسترى يۋري يلين, تج دەپارتامەنتى ەلوردالىق گارنيزونىنىڭ باسشىلىعى مەن جەكە قۇرامى, ازاماتتىق قورعاۋ ورگاندارىنىڭ ارداگەرلەرى, ءورت ءسوندىرۋ كەزىندە قازا تاپقان باتىرلاردىڭ تۋىستارى قاتىستى.
قۇتقارۋشىلار ساياباعىنىڭ اۋماعى بالالار مەن ەرەسەكتەرگە ارنالعان ايماقتارعا بولىنگەن. قالا تۇرعىندارىنا ارنالعان دەمالىس ايماعى بار. وعان قوسا, ازاماتتىق قورعاۋ قىزمەتىنىڭ ۇزدىكتەرىنە ارنالعان قۇرمەت تاقتاسى ورناتىلعان. قۇتقارشىلار ساياباعى ا. يانۋشكەۆيچ پەن ا. پۋشكين كوشەلەرىنىڭ قيىلىسىندا ورنالاسقان. ساياباق ءورت ءسوندىرۋشى-قۇتقارۋشىلار مەن قىزمەتتىك مىندەتىن ورىنداۋ كەزىندە قازا تاپقاندار قۇرمەتىنە اباتتاندىرىلعان.
سونداي-اق, اۋماقتا 1964 جىلى شىققان اتس-30 ماز 205 ارنايى ءورت ءسوندىرۋ ماشيناسى تۇر. بۇعان دەيىن بۇل كولىكتى قازاقستاندىقتار ەلباسى جايلى فيلمنەن كورگەن.
«ساياباقتا 150-گە جۋىق اعاش وتىرعىزىلدى. اۋماقتى ءالى دە دامىتا تۇسەمىز. ءبىز ءۇشىن قالا تۇرعىندارىنىڭ بوس ۋاقىتىن پايدالى وتكىزەتىن ورىندار سانىن ارتتىرۋ ماڭىزدى. بيىل 150 اۋلا مەن 40 قوعامدىق كەڭىستىك (ساياباقتار, گۇلزارلار, جەلەكجولدار) سالامىز. جالپى العاندا, 70-كە جۋىق اۋلا مەن قوعامدىق كەڭىستىكتىڭ جۇمىسى اياقتالىپ, اشىلعالى تۇر. مەملەكەت باسشىسىنىڭ تاپسىرماسى بويىنشا اباتتاندىرۋ كەزىندە كوگالداندىرۋعا ەرەكشە كوڭىل بولىنەدى», دەدى ەلوردا اكىمى التاي كولگىنوۆ.
بىلتىر نۇر-سۇلتاندا 76 گەكتار اۋماق اباتتاندىرىلدى.