«Egemen Qazaqstan» كىتاپحاناسى» سەرياسىمەن «ەل جانە ەلباسى» جيناعى جارىق كوردى. كىتاپتا كەيىنگى ەكى جىلدا «Egemen Qazaqstan» گازەتىندە جاريالانعان ەلىمىزدىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ مەملەكەت قالىپتاستىرۋشى رەتىندەگى تۇلعالىق, قايراتكەرلىك قىرلارىن كەڭىنەن اشىپ كورسەتەتىن, تاۋەلسىزدىك تاريحىنان سىر شەرتەتىن ماقالالار مەن ەستەلىكتەر توپتاستىرىلعان.
ماقالا اۆتورلارى – ەلباسىنىڭ تاۋەلسىز مەملەكەتتىڭ ىرگەسىن قالىپتاستىرۋعا اتسالىسقان ۇزەڭگىلەستەرى, مەملەكەت جانە قوعام قايراتكەرلەرى. سونداي-اق اۆتورلار اراسىندا شەتەلدىك مەملەكەت جانە قوعام قايراتكەرلەرى, جۋرناليستەر مەن ساراپشىلار دا بار. اقپارات جانە قوعامدىق دامۋ ءمينيسترى ايدا بالاەۆا جيناققا جازعان العىسوزىندە ەلىمىزدىڭ وتىز جىلداعى جەتىستىكتەرىنە توقتالىپ, ونىڭ ءبارى «جاس قازاق مەملەكەتىنىڭ ارحيتەكتورى, قازاقستاننىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆتىڭ ەرەن ەڭبەگىنىڭ, جاھاندىق اۋقىمداعى قايراتكەرلىك قىزمەتىنىڭ ماۋەلى جەمىسى» ەكەنىن اتاپ ءوتتى. «ەڭ باستىسى – وسى كىتاپ ارقىلى ەلدىك مۇرات جولىندا بۇكىل قىزمەتتىك عۇمىرىن ارناپ, قانشاما عاسىر تاريحقا ەسەسى كەتكەن بودان ەلدەن الەمگە اتى تانىلعان ازات ەل, مىقتى مەملەكەت جاساعان تۇڭعىش پرەزيدەنتىمىز جايلى ادامگەرشىلىك پەن اقيقاتقا قۇرىلعان جىلى ەستەلىكتەر جيناعىن ۇرپاقتار جادىنا امانات ەتۋ», دەدى مينيستر. كىتاپ «ازاتتىق ارحيتەكتورى», «ەلدىكتىڭ ەڭسەسىن تىكتەگەن», «ەلباسى جانە ەلوردا», «سارابدال ساياساتكەر» اتتى ءتورت بولىمنەن تۇرادى.