«استانا» حالىقارالىق قارجى ورتالىعى (احقو) قۇقىقتىق-كونسۋلتاتيۆتىك كەڭەسىنىڭ توراعاسى مايكل بلەردىڭ «احقو قۇقىعى» كىتابىنىڭ تۇساۋكەسەر ءراسىمى ءوتتى, دەپ حابارلايدى Egemen.kz.
بۇگىن «Astana Finance Days» اياسىندا «استانا» حالىقارالىق قارجى ورتالىعىنىڭ قۇقىقتىق ماسەلەلەر جونىندەگى جىل سايىنعى كونفەرەنتسياسى ءوتتى. شارا بارىسىندا «احقو قۇقىعى» كىتابىنىڭ رەسمي تۇساۋكەسەر ءراسىمى ءوتتى. كىتاپ اۆتورى – احقو قۇقىقتىق-كونسۋلتاتيۆتىك كەڭەسىنىڭ توراعاسى, كورولدىك ادۆوكات ءارى لوندون قالاسىنداعى 3 Verulam Buildings Barristers جەتەكشى كەڭەسشىسى مايكل بلەر.
كىتاپتا قارجى ورتالىعى قۇقىقتىق رەجيمىنىڭ قالىپتاسۋ تاريحى, ورتالىق اكتىلەرىنىڭ نەگىزى رەتىندە اعىلشىن قۇقىعىنىڭ تاڭدالۋىنىڭ سەبەبى, تاجىريبەدە قولدانۋى سيپاتتالعان.
قر ستراتەگيالىق جوسپارلاۋ جانە رەفورمالار اگەنتتىگىنىڭ توراعاسى, احقو باسقارۋشىسى قايرات كەلىمبەتوۆتىڭ ايتۋىنشا, اتالعان كىتاپ – مۇنداي مازمۇنداعى العاشقى ەڭبەك.
«احقو قازىردىڭ وزىندە قازاقستانعا وڭىرلىك جانە حالىقارالىق ينۆەستيتسيا تارتۋ, ءادىل جانە تاۋەلسىز سوت تورەلىگىن قولجەتىمدى ەتۋ, سونداي-اق جالپى ەل ەكونوميكاسىنىڭ ءوسۋىن جەدەلدەتۋ ىسىندە ماڭىزدى ءرول اتقارادى. كىتاپتا وسىنىڭ ءبارى ەگجەي-تەگجەيلى جازىلعان», دەدى ول.
تۇساۋكەسەردە احقو قۇقىق اكادەمياسىنىڭ اكادەميالىق كەڭەسىنىڭ مۇشەسى, نۇرسۇلتان نازارباەۆ قورىنىڭ اتقارۋشى ديرەكتورىنىڭ ورىنباسارى, قازاقستان رەسپۋبليكاسىنان ەۋروپا كەڭەسىنىڭ ۆەنەتسيالىق كوميسسياسىنىڭ مۇشەسى يگور روگوۆ تا پىكىر ءبىلدىردى. كىتاپتى قازاقستاندىق جانە شەتەلدىك زاڭگەرلەردىڭ قىزىعۋشىلىعىن تۋدىرىپ, احقو قىزمەتىمەن تانىسقىسى كەلەتىن جاندار ءۇشىن تاجىريبەلىك قۇرالعا اينالاتىنىنا سەنىمدى ەكەنىن ايتتى.
ايتا كەتەيىك, «استانا» حالىقارالىق قارجى ورتالىعى قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ باستاماسىمەن «بەس ينستيتۋتسيونالدىق رەفورمانى ىسكە اسىرۋ جونىندەگى 100 قادام» ۇلت جوسپارى شەڭبەرىندە قۇرىلدى.