قازاقستان رەسپۋبليكاسى تاۋەلسىزدىگىنىڭ 30 جىلدىعىن اتاپ ءوتۋ شەڭبەرىندە قازاقستان ادەبيەتىنىڭ ۇزدىك تۋىندىلارى 2021 جىلعى ۆيرتۋالدى لوندون كىتاپ جارمەڭكەسىندە ۇسىنىلدى, دەپ حابارلايدى Egemen.kz.
قازاقستاننىڭ ۇلىبريتانياداعى ەلشىلىگى قازاقستان رەسپۋبليكاسىنىڭ ۇلتتىق اكادەميالىق كىتاپحاناسىمەن (ۇاك) جانە «ۇلتتىق اۋدارما بيۋروسى» كوعامدىق قورىمەن (ۇاب) بىرلەسىپ, 21 ماۋسىم مەن 1 شىلدە ارالىعىندا لوندون كىتاپ جارمەڭكەسىنە قاتىستى.
اتالعان جارمەڭكە – باسپا, اۋديو, كينو, تەلەونىمدەردى جانە ساندىق فورماتتاعى مازمۇندى ساتۋعا جانە تاراتۋعا, سونداي-اق ولاردىڭ باسپا قۇقىقتارىن تالقىلاۋعا ارنالعان جاھاندىق الاڭ. جىل سايىن وندا الەمنىڭ تۇكپىر-تۇكپىرىنەن 25 مىڭنان استام باسپا ءىسى ماماندارى جينالادى.
قازاقستان جارمەڭكەدە شوقان ءۋاليحانوۆتىڭ تاڭدامالى شىعارمالارى, زاماناۋي قازاق ادەبيەتىنىڭ انتولوگيالارى, سونداي-اق اباي قۇنانباي ۇلىنىڭ شىعارمالار جيناعىن كوپشىلىك نازارىنا ۇسىندى. اتالمىش اعىلشىنتىلدى باسىلىمدار 2019 جانە 2020 جىلدارى كەمبريدج ۋنيۆەرسيتەتىنىڭ باسپاسىمەن سەرىكتەستىكتە باسىلعان.
سونىمەن قاتار ستەندتە ۇاك جاڭا ەلەكتروندى كىتاپحاناسىنىڭ كىتاپتارى جانە ۇاب وكسفورد ۋنيۆەرسيتەتى باسپاسىمەن ارىپتەستىكتە جاريالاعان وكسفورد ەكونوميكالىق جانە الەۋمەتتىك سوزدىكتەرى ۇسىنىلدى.
ۇاب جارمەڭكەدە 500 مىڭ سوزدەن تۇراتىن اعىلشىن-قازاق جانە قازاق-اعىلشىن تىلدەرىندەگى وكسفورد قازاق سوزدىگىنىڭ جوباسىن ۇسىندى. جوسپار بويىنشا, سوزدىك 2021 جىلدىڭ سوڭىنا دەيىن باسىلىپ شىعۋى ءتيىس.