سەنات توراعاسى ماۋلەن اشىمباەۆ قازاقستاندا جۇمىس ىستەيتىن ديپلوماتيالىق كورپۋستىڭ جانە حالىقارالىق ۇيىمداردىڭ وكىلدەرىمەن كەزدەستى, دەپ حابارلايدى Egemen.kz.
سەنات سپيكەرى الدىمەن, جوعارى پالاتانىڭ بيىلعى سەسسياداعى زاڭ شىعارۋ قىزمەتى ەكى نەگىزگى مىندەتكە باعىتتالعانىن اتاپ ءوتتى. ولاردىڭ ءبىرى كوروناۆيرۋس پاندەمياسىمەن كۇرەس جۇمىستارى جانە ىندەتتىڭ الەۋمەتتىك-ەكونوميكالىق سالدارىن ەڭسەرۋ بولسا, ەكىنشىسى – مەملەكەت باسشىسىنىڭ باستاماسىمەن قولعا الىنعان كەشەندى رەفورمالاردى ىسكە اسىرۋدى قۇقىقتىق تۇرعىدان قامتاماسىز ەتۋ.
سونداي-اق ماۋلەن اشىمباەۆ ءوز سوزىندە پاندەميا كەزەڭىندە ازاماتتار مەن بيزنەستى قولداۋ ماقساتىمەن قابىلدانعان ماڭىزدى زاڭدارعا توقتالدى. «قازاقستاندا ازاماتتارىمىزدى قورعاۋعا جانە ەكونوميكامىزدى قولداۋعا ارنالعان داعدارىسقا قارسى اۋقىمدى شارالار قابىلداندى. بىلتىر وسى ماقساتقا 14 ملرد دوللاردان استام قاراجات نەمەسە جالپى ىشكى ءونىمنىڭ 9 پايىزى ءبولىندى. داعدارىسقا قارسى زاڭدار جەدەل قابىلدانىپ وتىردى. ولاردىڭ قاتارىندا بيۋدجەتكە, سالىق كودەكسىنە تۇزەتۋلەر ەنگىزۋ, بيزنەس پەن ينۆەستورلاردى قولداۋ ماسەلەلەرى تۋرالى, مەديتسينا قىزمەتكەرلەرىنە قولداۋ كورسەتۋ تۋرالى جانە تاعى باسقا زاڭدار بار», دەدى سەنات سپيكەرى.
سونىمەن قاتار ول ەل پرەزيدەنتىنىڭ باستاماسىمەن قولعا الىنعان جۇيەلى رەفورمالاردىڭ ىسكە اسىرىلۋىن زاڭنامالىق تۇرعىدان قامتاماسىز ەتۋ جولىنداعى پارلامەنتتىڭ قىزمەتى تۋرالى ءسوز قوزعادى. «مەملەكەت باسشىسىنىڭ ەلىمىزدى جاڭعىرتۋ باعدارىندا الداعى ماقسات-مىندەتتەر ناقتىلانعان. ولار – ەڭ الدىمەن, ساياسي جۇيەنى دەموكراتيالاندىرۋ, ونىڭ تەڭگەرىمدىلىگىن قامتاماسىز ەتۋ, ساياسي باسەكەلەستىكتى ارتتىرۋ, ازاماتتاردىڭ قۇقىقتارىن ىسكە اسىرۋ ءۇشىن لايىقتى جاعداي جاساۋ جانە تاعى باسقالارى», دەدى ماۋلەن اشىمباەۆ.
سەنات توراعاسى ەل پرەزيدەنتىنىڭ جاڭعىرتۋ باعدارىنداعى كەلەسى باسىمدىقتار مەملەكەتتىك باسقارۋدىڭ تيىمدىلىگىن ارتتىرۋ, مەملەكەتتىك ورگانداردىڭ حالىققا اشىق بولۋى قامتاماسىز ەتۋ جانە جۇمىس بارىسىندا ازاماتتاردىڭ پىكىرلەرىن ەسكەرۋ ەكەنىن ايتتى. مۇنداي تاسىلدەردىڭ نەگىزى «حالىق ۇنىنە قۇلاق اساتىن مەملەكەت» تۇجىرىمداماسىندا ناقتى كورسەتىلگەن.
«قازاقستان پرەزيدەنتىنىڭ الەۋمەتتىك سالاداعى رەفورمالارى ءادىل, ينكليۋزيۆتى الەۋمەتتىك ساياساتتى ىسكە اسىرۋعا, ءبىلىم بەرۋ جانە دەنساۋلىق ساقتاۋ سالالارىن جاڭعىرتۋعا باعىتتالعان. ءبىز ءار ازامات ءوز مۇمكىندىگىن ىسكە اسىرۋىنا جانە كومەككە مۇقتاج جانداردىڭ نازاردان تىس قالماۋىنا باسا ءمان بەرەمىز», دەدى ماۋلەن اشىمباەۆ.