ەۋروپادا شەكتەۋلەر جەڭىلدەۋىنە بايلانىستى كوروناۆيرۋس جۇقتىرعاندار سانى ارتتى. بۇل تۋرالى دۇنيەجۇزىلىك دەنساۋلىق ساقتاۋ ۇيىمىنىڭ (ددسۇ) ەۋروپالىق بيۋرو ديرەكتورى حانس كليۋگە مالىمدەدى, دەپ حابارلايدى Egemen.kz.
كليۋگەنىڭ ايتۋىنشا, ستاديونداردا, سونداي-اق EURO-2020 ويىندارىن ۇيىمداستىراتىن قالالارداعى پابتار مەن بارلاردا جينالعان ادامدار كوروناۆيرۋس جۇقتىرعاندار سانىن كوبەيتەدى. سوڭعى تاۋلىكتە COVID-19 جۇقتىرعاندار سانى ەڭ كوپ تىركەلگەن ون ەلدىڭ تورتەۋى ەۋروپا ايماعىندا ورنالاسقان.
ددسۇ مالىمەتى بويىنشا, ايماقتا كوروناۆيرۋس ينفەكتسياسىن جۇقتىرعاندار سانىنىڭ 10 اپتالىق تومەندەۋى جاقىن ارادا اياقتالادى جانە جانكۇيەرلەر مەن باسقا ادامدار مۇقيات بولماسا, جاڭا تولقىن باستالۋى مۇمكىن.
«اقپاننىڭ باسىنان بەرى ايماقتا COVID-19 جۇقتىرۋ دەرەگى ازايعانان كەيىن ورتالىق جانە شىعىس ەۋروپا مەن بالقاندا كورسەتكىش قايتا وسكەنى بايقالادى. ءالى تولىق اياقتالعان جوق», دەپ جازدى كليۋگە Twitter-پاراقشاسىندا.
ءوز كەزەگىندە گەرمانيانىڭ ىشكى ىستەر ءمينيسترى حورست زەەحوفەر ۋەفا ەۋروپا فۋتبولىنىڭ باسقارۋشى ورگانىنىڭ جانكۇيەرلەردى جيناۋعا رۇقسات بەرۋى تۋرالى شەشىمىن «تولىعىمەن جاۋاپسىزدىق» دەپ اتادى.
«ستاديونداردى عانا ەمەس, حالىقتىڭ وعان قالاي باراتىنىن, اۆتوبۋستاردا قالاي وتىراتىنىن قاداعالاۋ كەرەك. ءدال وسى جاعدايلار ۆيرۋستىڭ تارالۋىن تۋدىرادى», دەدى ددسۇ-نىڭ توتەنشە جاعدايلار جونىندەگى اعا وفيتسەرى كەترين سموللۆۋد.