بۇگىن مادەنيەت جانە سپورت مينيسترلىگىندە ونلاين فورماتتا «2021 - بالالار ادەبيەتى جىلى» اياسىندا مينيسترلىكتىڭ ۇسىنىسىمەن «التىن ساقا» بالالار باسپاسىنان شىققان 100 كىتاپتىڭ تۇساۋكەسەر ءراسىمى ءوتتى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
ءىس-شاراعا مادەنيەت جانە سپورت ءمينيسترى اقتوتى رايىمقۇلوۆا, مادەنيەت جانە سپورت ءمينيسترىنىڭ كەڭەسشىسى مالىك وتارباەۆ, «التىن ساقا» بالالار باسپاسىنىڭ ديرەكتورى قانات يبراگيموۆ, باسپانىڭ باس رەداكتورى سايات قامشىگەر, «بالدىرعان» جۋرنالىنىڭ باس رەداكتورى دۇيسەن ماعلۇموۆ, ء«مولدىر بۇلاق» جۋرنالىنىڭ باس رەداكتورى داۋلەتبەك بايتۇرسىن ۇلى, بالالار جازۋشىسى مەيىرجان جىلقىباي, سەرىكبول حاسان, بالالار ادەبيەتىنىڭ جانە باق وكىلدەرى قاتىستى.
اقتوتى رايىمقۇلوۆا مينيسترلىك بۇل ءجۇز كىتاپتى رەسپۋبليكامىزدىڭ بارلىق كىتاپحاناسى مەن ونەر ورداسى, مادەنيەت وشاعى ارقىلى ناسيحاتتاۋعا, وقىرماندارىنىڭ تابىلۋىنا قولداۋ كورسەتۋگە دايىن ەكەنىن جەتكىزدى.
«تاربيەلىك, تانىمدىق, دامىتۋشىلىق قىرلارى ايرىقشا وسى كىتاپتار ەلىمىزدىڭ بولاشاق تۇلعالارىنىڭ قالىپتاسۋىنا يگى اسەر ەتسىن. قازاق ەلىنىڭ بولاشاعى – بالالارىمىز بەن جاستارىمىز. بالالارىن ويلاعان ەلدىڭ ەرتەڭى نۇرلى, شۋاقتى, ساۋلەلى ەكەنى ايدان انىق.
سوندىقتان بۇگىنگى باسقوسۋىمىزدى پايدالانا وتىرىپ وسى باسپانىڭ باسى-قاسىندا جۇرگەن قانات يبراگيموۆقا, سايات قامشىگەرگە جانە 100 كىتاپتى دايىنداعان بارلىق اۆتور مەن شىعارماشىلىق توپقا العىس ايتامىن.
سونىمەن بىرگە بيىلعى «بالالار ادەبيەتى جىلى» اياسىندا وسىنداي ۇلگىدە كىتاپ شىعارىپ, جاس بۇلدىرشىندەرىمىزدىڭ وسۋىنە, دامۋىنا جانە ۇلتتىق مادەنيەتىمىزدىڭ ناسيحاتتالۋىنا ۇلەس قوسىپ وتىرعان بارلىق باسپا مەن كىتاپحاناعا, بالالار ادەبيەتىنىڭ وكىلىنە, كورنەكتى اقىن مەن جازۋشىعا شىن ريزاشىلىعىمدى بىلدىرەمىن», دەدى.
ايتا كەتەيىك مينيسترلىك تاراپىنان 2021 جىلدىڭ «بالالار ادەبيەتى جىلى» دەپ جاريالانۋىنىڭ ناتيجەسىندە الماتى قالاسىندا «التىن ساقا» بالالار باسپاسى اشىلىپ, جاس وقىرماندارعا ارناپ كىتاپ شىعارا باستادى. وسى ۋاقىتقا دەيىن باسپا بالالارعا ارنالعان 100 كىتاپ شىعارىپ ۇلگەردى.
اتالعان 100 كىتاپتىڭ ىشىندە بالالارعا ارنالعان ەرتەگىلەر بار. ول ەرتەگىلەردىڭ اۆتورلارى جىبەك زينەلوۆا, شرازاددين كانيازوۆ, مەيىرجان جىلقىباي, سەرىك ەرعالي, مالىكە سەرعالى, الۋا ەسبولاتقىزى, نۇربەرگەن باقىت ۇلى سياقتى قالامگەرلەر. بالالاردىڭ قازىرگى سۇرانىسىنا ساي جاڭا ۇرپاققا ارنالعان بۇل ەرتەگىلەردىڭ بارلىعى شاعىن كولەمدە, وقۋعا جەڭىل, تۇسىنۋگە وڭاي. كىتاپتاردىڭ ءبىر ەرەكشەلىگى – بارلىعىندا QR كود بار. ۇيالى تەلەفوننىڭ QR كودى ارقىلى ەرتەگىلەردىڭ ءبارىن تىڭداۋعا بولادى.
سونىمەن قاتار كىتاپتىڭ ىشىندە بالالارعا ارنالعان اڭگىمەلەر دە كوپ. «ۇلتتىق مەرەكە», «انام ەكەۋمىز», «اكە مەن بالا», «وسەر ۇرپاققا ونەگە», «انام ءبارىن سەزەدى», «سىيلىق» سياقتى اڭگىمە كىتاپتاردىڭ اتتارى ايتىپ تۇرعانداي, ۇلتتىق قۇندىلىقتارىمىزدى اسپەتتەر, بۇگىنگى جاڭا زامان بالالارىنا جاڭا تالاپتار بيىگىنەن جازىلعان.
ال «اسىل مۇرا», «جەمىستەر», «كوكونىستەر», ء«ۇي جانۋارلارى» سياقتى بوياماقتار كىشكەنتاي بالالارعا سۋرەتتەردى بوياپ, سول زاتتار جايلى تاقپاق وقىپ, جاتتاۋعا مۇمكىندىك بەرەدى. مۇنداي قازاقى دۇنيەتانىمداعى بوياماقتار ۇل-قىزداردىڭ دۇرىس ءتالىم-تاربيە الىپ, پايدالى اقپارات قابىلداۋىن, بويلارىنداعى جاقسى قابىلەتتەردىڭ دامۋىن جەتىلدىرەدى.
«اۋا رايى», «كولىكتەر», «ماماندىقتار», «جول ەرەجەلەرى», «كوڭىل كۇي» ءتارىزدى كىشكەنە بالالارعا ارنالعان تانىمدىق كىتاپشالاردىڭ دا ماڭىزى ايرىقشا. بۇل كىتاپشالار ارقىلى كىشكەنە بۇلدىرشىندەر اينالانى تانيدى, قورشاعان ورتانى زەرتتەپ بىلەدى.
وسى 100 كىتاپتىڭ ىشىندە اۋدارما ەرتەگىلەر دە بار. ولاردىڭ قاتارىنداعى حانس كريستيان اندەرسەننىڭ «قار پاتشايىمى», «قايسار قالايى سولدات» سياقتى كوپشىلىككە ءمالىم 9 كىتابىن ەرەكشە ايتۋعا بولادى.
بۇل كىتاپتار جىلتىر, وفسەتتىك قاعازدا 2000 تارالىممەن جارىق كوردى. كىتاپتاردى ارنايى سارالاۋدان, ىرىكتەۋدەن وتكىزىپ بارىپ باساتىن جاعداي قالىپتاسقان. ول ءۇشىن تاجىريبەلى قالامگەر, رەداكتور, پسيحولوگتاردان تۇراتىن ارنايى ساراپتاۋ كوميسسياسى جۇمىس ىستەيدى.
كىتاپتار الماس سىرعاباەۆ, ماقسات اليەۆ, رامازان پەيىزوۆ, اننا نوزدرينا سىندى سۋرەتشى-يلليۋستراتورلاردىڭ سۋرەتتەرىمەن ارلەنگەن.
اقتوتى رايىمقۇلوۆا بۇگىن جاس وقىرمانعا جول تارتاتىن كىتاپتار جارقىن بولاشاققا قوسىلعان قوماقتى ۇلەس ەكەنىن ايتىپ, ءدال وسىنداي يگى جوبالار الداعى ۋاقىتتا دا جالعاسىن تابا بەرەتىنىنە سەنىم ءبىلدىردى.
«وزدەرىڭىزگە ءمالىم, مادەنيەت جانە سپورت مينيسترلىگىنىڭ ۇسىنىسى بويىنشا بيىلعى 2021 جىل «بالالار ادەبيەتى جىلى» بولىپ جاريالاندى. وسى ورايدا جىلدىڭ باسىنان بەرى بىرنەشە ءىس-شارا, جوبا جۇزەگە اسىپ جاتىر.
جىلدىڭ باسىندا الماتى قالاسىنان اشىلعان «التىن ساقا» بالالار باسپاسى دا ەلىمىزدىڭ بۇلدىرشىندەرىنە ءتۇرلى كىتاپتار شىعارا باستاعانى كوڭىل قۋانتادى. ءار جاستاعى بالالارعا ارنالعان ءتۇرلى ەرتەگىلەر, اڭگىمەلەر, تاقپاقتار مەن جۇمباقتار, اۋدارما ەرتەگىلەر مەن ءارتۇرلى شىعارمالاردى شىعارىپ جاتقان باسپانىڭ ونىمدەرى الداعى ۋاقىتتا جاس وقىرمانداردىڭ كوڭىلدەرىنەن شىعىپ, جۇرەكتەرىنە جەتە بەرەر دەگەن ويدامىن.
باسپا شىعارعان «جولتەرەك», «ەرەكشە ەرتەگىلەر», «كامپيتتى جەگەن كىم؟», «الىپتىڭ وقيعاسى» سياقتى ەرتەگىلەر بۇگىندە ءوز وقىرماندارىن تاۋىپ ۇلگەردى. باسپانىڭ وسى ورايدا جاڭا, جاس اۆتورلارمەن جۇمىس ىستەپ, ولاردىڭ زاماناۋي ەرتەگىلەرىن جارىققا شىعارۋعا دەگەن ۇمتىلىس مەن تالپىنىسى ءبىر جۇيەگە تۇسكەنى قاتتى قۋانتادى.
«جىگىتتىڭ سۇلتانى بول» دەگەن كىتاپتا ۇل بالالاردىڭ تۇلعا بولىپ قالىپتاسۋى ءۇشىن ءتۇرلى پايدالى كەڭەستەر ايتىلعان ەكەن. «ادەبى ادەمى حانشايىم بول» - قازاقتىڭ ءار قىزىنىڭ قولىندا جۇرەرلىكتەي اسىل سوزدەر مەن ونەگەگە تولى كىتاپ. بۇل كىتاپتى سەگىزىنشى سىنىپتى بىتىرگەن قىزدىڭ جازىپ شىققانى, كىتاپتى جازاردا اجەسىمەن, اناسىمەن اقىلداسىپ, كەڭەس الۋى, كوپتەگەن كىتاپتى وقىپ, ىزدەنىپ بارىپ وسى ەڭبەككە كىرىسكەنى ايتۋعا تۇرارلىق», دەدى مينيستر.
ءسوز اراسىندا انا تىلىمىزدە شىعىپ جاتقان الەمدىك كلاسسيكتەردىڭ ەرتەگىلەرى بىرنەشە بۋىنعا رۋحاني ازىق بولعانىن, مۇنداي تۋىندىلار تاۋەلسىز ەلىمىزدىڭ جاس وقىرماندارىنا دا قىزىقتى ەكەنىن اتاپ ءوتتى.
«بيىل «بالالار ادەبيەتى جىلىنا» وراي ءالى جىلدىڭ اياعىنا دەيىن تالاي جۇزدەگەن كىتاپ بۇل باسپادان شىعىپ, ەلىمىزدىڭ بار وڭىرلەرىندەگى جاس وقىرماندارعا جول تارتادى دەپ سەنەمىن. الدارىڭىزداعى بالالارعا ارنالعان 100 كىتاپ جىلدىڭ اياعىنا دەيىن 1000 كىتاپقا اينالۋىنا تىلەكتەسپىن», دەدى مينيستر.