اقتاۋدا پاتەرىندەگى جاندىكتى ءوزى دەزينفەكتسيالاپ, كورشىسىن ءولتىرىپ العان تۇرعىن 6 جىلعا باس بوستاندىعىنان ايىرىلدى, دەپ حابارلايدى Egemen.kz.
قايعىلى وقيعا وسىدان 5 اي بۇرىن بولعان ەدى. 46 جاستاعى تۇرعىن پاتەرىن تىيىم سالىنعان «كۆيكفوسپەن» پرەپاراتىمەن ۋلاپ, كورشىلەرىنە ەسكەرتپەستەن كەتىپ قالعان. سالدارىنان جوعارعى قاباتتا تۇراتىن ايەل مەن ونىڭ 10 ايلىق بالاسى كوز جۇمدى. تاعى 5 ادام ۋلانىپ, اۋرۋحانانىڭ جانساقتاۋ بولىمىنە ءتۇستى. سوتتا ايەلدىڭ كىناسى تولىق دالەلدەندى. ول جازاسىن قاۋىپتىلىگى تومەن قىلمىستىق تۇزەتۋ مەكەسىندە وتەيتىن بولدى.
«سوت ۇكىمىمەن اتالعان ازاماتشا قر قك 304-بابى 3-بولىگى بويىنشا كىنالى دەپ تانىلىپ, وعان 6 جىل مەرزىمگە باس بوستاندىعىنان ايىرۋ جازاسى تاعايىندالدى. ازاماتتىق تالاپ ازاماتتىق ءىس بويىنشا قارالادى», دەپ حابارلايدى وبلىستىق سوتتىڭ ءباسپاسوز حاتشىسى گاۋحار نۇرحانوۆا.