جۋرناليستەر اراسىندا دوپ دوداسى مارەگە جەتتى

بايلانىس جانە اقپارات سالاسى قىزمەتكەرلەرى كۇنى قارساڭىنداعى ءتۋرنيردى شىعىس قازاقستانداعى جۋرناليستەر وداعى فيليالى مەن وبلىستىق دەنە شىنىقتىرۋ جانە سپورت باسقارماسى ۇيىمداستىردى.

جولداستىق كەزدەسۋ بولعانىمەن, شىن مىقتى كوماندا جەڭىسكە جەتۋى زاڭدىلىق. دايىندىقپەن كەلگەن كوماندالار بىردەن كوزگە ءتۇسىپ, شيرەك فينالعا ءوتتى.

– بۇل جەردەگى ءبىزدىڭ باستى ماقساتىمىز – شىعىستاعى جۋرناليستەردىڭ ىنتىماعى مەن بىرلىگىن ارتتىرۋ ەدى. تارتىستى وتكەن جارىسقا دەمەۋشىلىك كورسەتكەن «كازتسينك», «كازمينەرالس», «باقىرشىق تاۋ-كەن ءوندىرۋ كاسىپورنى» جشس باسشىلىعىنا العىس بىلدىرەمىز, – دەدى جۋرناليستەر وداعى فيليالىنىڭ ديرەكتورى ازامات قاسىم.

كارانتيندىك شارالارعا بايلانىستى كوپتەن بەرى باستارى قوسىلماعان ارىپتەستەر سپورتتىق شارادا كەزدەسىپ, ءبىر سەرپىلىپ قالدى.

– سەمەيدەن ەكى توپ كەلىپ, ۆولەيبولدا, فۋتبولدا باق سىناپ كوردىك. كوماندامىزدىڭ اتى «الاش». جارىس جاقسى ءوتتى. جالعاسىن تاۋىپ, داستۇرگە اينالسا ەكەن دەيمىز, – دەپ تىلەگىن ءبىلدىردى «Qazaqstan» ۇلتتىق تەلەارناسىنىڭ سەمەيدەگى ءتىلشىسى ەرجان جاقىپ.

جارىس ناتيجەسىنە كەلەر بولساق, ۆولەيبولدان 1 ورىندى «التاي» تەلەارناسىنىڭ ويىنشىلارى قانجىعاعا باستى. 2 ورىن «مەنىڭ ولكەم» گازەتىنىڭ جۋرناليستەرىنە بۇيىردى. ال 3 ورىندى سەمەيدەن كەلگەن «الاش» كومانداسى قاناعات تۇتتى.

فۋتبولدا باق سىناعان كوماندالار دا وڭايشىلىقپەن بەرىسپەدى. ولاردىڭ ىشىندە 1 ورىننىڭ تۇعىرىنان «شىعىس اقپارات» كورىنىپ, 100 مىڭ تەڭگە مەن باعالى سىيلىقتارعا يە بولدى. 2 ورىندى «التاي»تەلەارناسىنىڭ ويىنشىلارى السا, 3 ورىنعا «كوكپەكتى» كومانداسى تابان تىرەدى. ال جۇلدەلى ورىنعا ىلىنبەگەن كوماندا ويىنشىلارعا ەستەلىك سىيلىقتار تابىس ەتىلدى.