Ashyq جۇيەسى بويىنشا انىقتالعان «قىزىل» مارتەبەسى بار بارلىق جەكە تۇلعالار اكىمشىلىك جاۋاپكەرشىلىككە تارتىلاتىن بولادى, دەپ حابارلايدى Egemen.kz.
10 جانە 21 ماۋسىم ارالىعىندا Ashyq جوباسى اياسىندا جۇمىس ىستەيتىن نىسانداردا «قىزىل» ستاتۋسى بار 570 جانە «سارى» ستاتۋسى بار 879 ادام تىركەلگەن. ءوزىن-ءوزى وقشاۋلاۋ رەجيمىن بۇزعانى ءۇشىن 9 ادام اكىمشىلىك جاۋاپكەرشىلىككە تارتىلدى.
سانيتاريالىق-ەپيدەميولوگيالىق قىزمەت ورگاندارى «قىزىل» ستاتۋسى بار قالعان ءتارتىپ بۇزۋشىلارعا قاتىستى اكىمشىلىك قۇقىق بۇزۋشىلىق تۋرالى ءىس قوزعاۋ جونىندەگى جۇمىستى جۇرگىزىپ جاتىر.
ەسكە سالايىق, 10 ماۋسىمدا كۆي-عا شالدىققان ناۋقاستار جانە ولارمەن بايلانىستا بولعان ادامدار ءۇشىن وقشاۋلاۋدىڭ مىندەتتى رەجيمىن كوزدەيتىن سانيتاريالىق-ەپيدەميولوگيالىق تالاپتار كۇشىنە ەنگەن بولاتىن. بەلگىلەنگەن تالاپتاردى ورىنداماعانى ءۇشىن وقشاۋلاۋ رەجيمىن بۇزۋشىلارعا 30 اەك نەمەسە 87 510 تەڭگە مولشەرىندە ايىپپۇل سالىنادى (قر اقبتك 452-بابى).