سارسەنبىدەن بەيسەنبىگە قاراعان ءتۇنى فۋتبولدان ەۋروپا بىرىنشىلىگىنىڭ توپتىق تۋرنيردەگى سوڭعى سايىستارى ءوتتى. سەۆيليادا سلوۆاكيا مەن يسپانيا كۇش سىناسسا, سانكت-پەتەربۋرگتە شۆەتسيا مەن پولشا شەبەرلىك بايقاستى. وسى ماتچتار اياقتالعاننان سوڭ گەرمانيا مەن ماجارستان جانە پورتۋگاليا مەن فرانتسيا اراسىنداعى تارتىستى تاماشالادىق. ءبىر كەرەمەتى, بۇل باسەكەلەردىڭ بارلىعى دا ءىرى ەسەپپەن اياقتالدى.
سەۆيلياداعى ماتچتىڭ 12-مينۋتىندا سلوۆاكيانىڭ قاقپاسىنا پەنالتي بەلگىلەندى. 11 مەترلىك نۇكتەگە الۆارو موراتا كەلدى. ءمادريدتىڭ «اتلەتيكو» كلۋبىنىڭ شابۋىلشىسى باعىتتاعان دوپتى مارتين دۋبراۆكا كەرى قايتاردى. ءبىر ساتتە اسقان شەبەرلىگىمەن تورتكۇل دۇنيەنى تامساندىرعان ول ارادا ءبىراز ۋاقىت وتكەندە ءوز جانكۇيەرلەرىن جەرگە قاراتتى. دۋبراۆكا اۋەلەپ كەلىپ, ماڭدايشاعا تيگەن دوپتى الاڭنىڭ سىرتىنا شىعارامىن دەپ ءوز قاقپاسىنا سوعىپ الدى. سول جاعدايدان كەيىن-اق سلوۆاكيالىقتاردىڭ سالى سۋعا كەتتى. ماتچ اياقتالعانعا دەيىن ولار الاڭ يەلەرىنىڭ ەكپىنىنە شىداس بەرە المادى. لايىقتى قارسىلىق كورسەتۋ بىلاي تۇرسىن, شتەفان تاركوۆيچتىڭ شاكىرتتەرى بىردە-ءبىر قاۋىپتى شابۋىل ۇيىمداستىرا الماي, ابدەن ابىگەرگە ءتۇستى.
ال پيرەنەي تۇبەگىنىڭ تۇلەكتەرى كەرىسىنشە, جاسىل الاڭدا ەركىن ويقاستاپ, ويلارىنا كەلگەنىن ىستەدى. ءبىرىنشى كەزەڭنىڭ سوڭعى سەكۋندىندا ەمەريك لياپورت مەرگەندىك تانىتسا, ۇزىلىستەن كەيىن پابلو سارابيا مەن پاۋ توررەستىڭ تەپكەن دوپتارى توردا تۋلادى. ول از دەسەڭىزدەر, يۋراي كۋتسكا تاعى ءبىر اۆتوگولدىڭ اۆتورى اتاندى. ناتيجەسىندە, يسپانيا قۇراماسى 5:0 ەسەبىمەن سلوۆاكيانىڭ تاس-تالقانىن شىعاردى.
شۆەتسيا مەن پولشا قۇرامالارى اراسىنداعى كەزدەسۋ باستالعان بەتتە ەميل فورسبەرگ ءوز كومانداسىن العا شىعاردى. 59-مينۋتتا ءدال سول ويىنشى ەكىنشى گولدى سالعاندا سكانديناۆيا تۇبەگىنەن كەلگەن سايىپقىرانداردىڭ بۇل باسەكەنى ءوز پايداسىنا شەشەتىنىنە ەشكىمنىڭ كۇمانى بولمادى. بىراق پولياكتار دا ايانىپ قالمادى. 61 جانە 84-مينۋتتاردا روبەرت لەۆاندوۆسكي نىسانانى قاتارىنان ەكى رەت ءدال كوزدەپ, ءوز جانكۇيەرلەرىنىڭ كەۋدەسىندە ءۇمىت وتىن مازداتتى. دەسەك تە 90+3 مينۋتتا تاجىريبەلى ۆيكتور كلاەسسوننىڭ الىمدىلىعى مەن العىرلىعىنىڭ ارقاسىندا شۆەدتەر اسا ماڭىزدى ماتچتا جەڭىسكە جەتتى. ەسەپ – 3:2.
ميۋنحەندەگى «الليانس ارەنادا» وتكەن ماتچتا توسىن ناتيجە تىركەلۋگە شاق قالدى. ءبىرىنشى تايمنىڭ باسىندا ادام سالاي ەسەپ اشتى. تارازى باسىن تەڭەستىرۋ ءۇشىن نەمىستەرگە باقانداي 55 مينۋت قاجەت بولدى. دەسەك تە كاي حاۆەرتستىڭ سوققان دوبىنا جەرگىلىكتى جانكۇيەرلەر قۋانىپ تا ۇلگەرمەدى. ارادا ەكى مينۋت وتپەي جاتىپ اندراش شافەر ماجارستان قۇراماسىن قايتا العا شىعاردى. ەگەر دە وسى ەسەپ ساقتالسا, گەرمانيانىڭ فۋتبولشىلارى پلەي-وففتان تىس قالاتىن ەدى. ال بۇل دەگەنىڭىز سەنساتسيانىڭ «كوكەسى». بىراق اۋپىرىمدەپ ءجۇرىپ, يواحيم ليوۆ باپتاعان كوماندا كوزدەگەن ماقساتىنا قول جەتكىزدى. 84-مينۋتتا لەون گورەتسكا نەمىستەردى بۇل ماسقارادان قۇتقاردى. ەسەپ – 2:2.
فرانتسيا مەن پورتۋگاليا قۇرامالارى دا ءدال سونداي ەسەپپەن تاراستى. بۇل ماتچتا ءۇش دوپ پەنالتيدەن كىردى. ەكەۋىن كريشتيانۋ رونالدۋ (30 جانە 60-مينۋتتار) سوقسا, بىرەۋىن كاريم بەنزەما (45-مينۋت) سالدى. سونداي-اق تاعى ءبىر گولدى ءدال سول بەنزاما ءوز ەنشىسىنە جازدى. 2:2 ەسەبى ەكى كوماندانى دا قاناعاتتاندىردى. وسى ورايدا پورتۋگاليا قۇراماسىنىڭ جۇلدىزى كريشتيانۋ الەم جانە ەۋروپا چەمپيوناتتارىندا سوققان گولدارىن 21-گە جەتكىزدى. بۇل – رەكوردتىق كورسەتكىش. سونىمەن قاتار ۇلتتىق كوماندا ساپىندا رونالدۋ 109 رەت نىسانانى ءدال كوزدەپ, يراننىڭ سۇرمەرگەنى ءالي دەايدىڭ ناتيجەسىن قايتالادى.
ءسويتىپ پلەي-وفف دوداسىنا جولداما العان 16 مىقتى انىقتالدى. ەندى 1/8 فينالدىق باسەكەدە مىنا كوماندالار ءوزارا كۇش سىناسادى: ۋەلس – دانيا (26 ماۋسىم, امستەردام), يتاليا – اۋستريا (27 ماۋسىم, لوندون), نيدەرلاند – چەحيا (27 ماۋسىم, بۋداپەشت), بەلگيا – پورتۋگاليا (28 ماۋسىم, سەۆيليا), حورۆاتيا – يسپانيا (28 ماۋسىم, كوپەنگاگەن), فرانتسيا – شۆەيتساريا (29 ماۋسىم, بۋحارەست), انگليا – گەرمانيا (29 ماۋسىم, لوندون) جانە شۆەتسيا – ۋكراينا (30 ماۋسىم, گلازگو).