ەلوردالىق پوليتسەيلەرگە جاڭا قىزمەتتىك كولىكتەردىڭ كىلتى تابىستالدى

نۇر-سۇلتان قالاسى پد قىزمەتتىك اۆتوكولىكتەر پاركى «Hyundai Elantra» جانە «Hyundai Tucson» ماركالى وتاندىق ءوندىرىستىڭ 30 اۆتوكولىگىمەن تولىقتى. جىل سوڭىنا دەيىن تاعى 11 اۆتوكولىك تاپسىرىلادى. ماسەلەن, وتكەن جىلى عانا ەلوردالىق پوليتسيا اۆتوپاركى تاعى 65 اۆتوكولىكپەن تولىققان بولاتىن.

قىزمەتتىك اۆتوكولىكتەر پاترۋلدىك پوليتسيا پولكىنە, مامانداندىرىلعان باتالونعا جانە ۋچاسكەلىك پوليتسيا ينسپەكتورىنا بەرىلدى. مۇنداي شارالار قوعامدىق ءتارتىپتى قامتاماسىز ەتۋ جۇمىسىندا جىلدامدىقتى ارتتىرۋعا مۇمكىندىك بەرەدى. ەلوردالىق پوليتسيا دەپارتامەنتىنىڭ قىزمەتتىك اۆتوكولىكتەر پاركىن جاڭارتۋ ءتارتىپ ساقشىلارىنىڭ جۇمىس ساپاسىن ارتتىرۋعا سەپتىگىن تيگىزەدى. بۇل مەملەكەت قابىلدايتىن اۋقىمدى شارالار كەشەنىنىڭ ءبىر بولىگى عانا.

«قۇرمەتتى پوليتسيا قىزمەتكەرلەرى, سىزدەردى كاسىبي مەرەكەلەرىڭىزبەن شىن جۇرەكتەن قۇتتىقتايمىن! سىزدەرگە قالا تۇرعىندارىنىڭ تىنىشتىعى مەن قاۋىپسىزدىگىن, كوشەلەردەگى ءتارتىپتى قامتاماسىز ەتۋ سەكىلدى ۇلكەن جاۋاپكەرشىلىك جۇكتەلەدى. بۇگىنگە دەيىن مىڭداعان ادامنىڭ ءومىرىن قاۋىپتەن اراشالاپ قالدىڭىزدار!

پاندەميا كەزىندە دە الدىڭعى شەپتە ەڭبەك ەتتىڭىزدەر: كۇزەت بەكەتتەرىندە كەزەكشىلىكتە بولىپ, قالانىڭ ۇزدىكسىز جۇمىسىن قامتاماسىز ەتتىڭىزدەر. مونيتورينگتىك توپتاردىڭ قۇرامىندا بولىپ, سانيتارلىق تالاپتاردىڭ بۇزىلۋىنىڭ الدىن الىپ, كوروناۆيرۋستىڭ تارالماۋىنا باعا جەتپەس ۇلەس قوسىپ كەلەسىزدەر.

ەل باسشىلىعىنىڭ تاپسىرماسى بويىنشا سىزدەرگە قولايلى جاعدايلار جاساۋ ءۇشىن جۇمىس ىستەيمىز: ءبىرىنشى. ىشكى ىستەر ورگاندارىن ماتەريالدىق-تەحنيكالىق جاراقتاندىرۋ. بۇگىن اۆتوپارك تاعى 30 اۆتوكولىكپەن تولىقتى. جىل سوڭىنا دەيىن قوسىمشا 11 بىرلىك ارنايى تەحنيكا جابدىقتاۋدى جوسپارلاپ وتىرمىز. بىلتىر وسىنداي 65 كولىك بولىنگەن بولاتىن.

ەكىنشى. سەرۆيستىك مودەلگە كوشۋ

حالىقپەن جۇمىستىڭ سەرۆيستىك مودەلىن ەنگىزۋ مەملەكەت باسشىسىنىڭ تاپسىرماسى بويىنشا «پوليتسيا قادامدىق قولجەتىمدىلىكتە» قاعيداتى بويىنشا جۇزەگە اسىرىلادى. وسى جوبا اياسىندا قالا اۋداندارى مەن تۇرعىن ءۇي ماسسيۆتەرىندە 16 زاماناۋي مودۋلدىك پوليتسيا بەكەتىن ورناتامىز. بۇدان بولەك, ەسىل اۋدانى پوليتسيا باسقارماسىنىڭ جاڭا اكىمشىلىك عيماراتى اشىلعان بولاتىن. سونىمەن قاتار بيىل ۋچاسكەلىك پوليتسيا پۋنكتتەرىنە جوندەۋ جۇمىستارى جۇرگىزىلەدى.

ءۇشىنشى. تۇرعىن ءۇي ماسەلەسى, سىياقى

قازاقستاندىق تۇرعىن ءۇي كومپانياسى (قيك) جەلىسى بويىنشا قاتىسۋشىلار ساناتى كەڭەيتىلدى – وعان مەديتسينا قىزمەتكەرلەرىنەن, مۇعالىمدەردەن, الەۋمەتتىك قىزمەتكەرلەردەن, مادەنيەت جانە سپورت قايراتكەرلەرىنەن بولەك پوليتسيا دەپارتامەنتى مەن توتەنشە جاعدايلار دەپارتامەنتىنىڭ قىزمەتكەرلەرى ەندى. بۇل جاڭالىق وتكەن جىلدان باستاپ ىسكە قوسىلدى. بيىل 100 پاتەر بەرىلەدى. سونىمەن قاتار, ءتارتىپ ساقشىلارى كەزەككە سايكەس وزگە دە تۇرعىن ءۇي باعدارلامالارى بويىنشا باسپانالى بولادى. سونداي-اق, ءتارتىپ ساقشىلارىنا سىياقى دا قاراستىرىلعان», دەدى ەلوردا اكىمى التاي كولگىنوۆ.

نۇر-سۇلتان قالاسى پوليتسيا دەپارتامەنتىنىڭ باستىعى ەرجان سادەنوۆ قالا اكىمدىگىنە تۇراقتى قولداۋ كورسەتىپ كەلە جاتقانى ءۇشىن ريزاشىلىعىن ءبىلدىرىپ, جىل سايىن ەلوردالىق پوليتسيانىڭ ماتەريالدىق-تەحنيكالىق بازاسى جاقسارىپ, قىزمەتكەرلەردىڭ الەۋمەتتىك-تۇرمىستىق ماسەلەلەرى شەشىلىپ جاتقانىن اتاپ ءوتتى.

«جاڭا تەحنيكا قىلمىسقا جانە قوعامدىق ءتارتىپتى بۇزۋعا قارسى كۇرەستە پوليتسيا جۇمىسىنىڭ جەدەلدىگىن, ۇيلەسىمدىلىگىن جانە تيىمدىلىگىن ارتتىرىپ, ازاماتتاردىڭ وتىنىشتەرىنە ۋاقتىلى دەن قويۋعا مۇمكىندىك بەردى.

مەملەكەت باسشىسىنىڭ تاپسىرماسى بويىنشا «پوليتسيا قادامدىق قولجەتىمدىلىكتە» قاعيداتى جۇزەگە اسىپ جاتىر. وسى تاپسىرمانى ىسكە اسىرۋ ماقساتىندا قر ىشكى ىستەر ءمينيسترى پوليتسيا گەنەرال-لەيتەنانتى ە.ز. تۇرعىمباەۆ 2021 جىلدى «قۇقىق بۇزۋشىلىقتىڭ الدىن الۋ جىلى» دەپ جاريالادى. قۇقىقتىق ءتارتىپتى قورعاۋ, ازاماتتاردىڭ قاۋىپسىزدىگى مەن تىنىشتىعىن قامتاماسىز ەتۋ ءبىز ءۇشىن باستى مىندەت بولىپ سانالادى», دەپ اتاپ ءوتتى نۇر-سۇلتان قالاسى پوليتسيا دەپارتامەنتىنىڭ باستىعى گەنەرال-مايور ەرجان سادەنوۆ.

سونىمەن قاتار قىزمەتتىك مىندەتتەرىن ادال اتقارعانى جانە ەرەكشە كوزگە تۇسكەن پوليتسيا قىزمەتكەرلەرىنە جۇمىستا جوعارى ناتيجەلەرگە قول جەتكىزگەنى ءۇشىن ەلوردا اكىمى التاي كولگىنوۆ العىس حاتتار تابىس ەتتى. ولاردىڭ اراسىندا جەدەل-كريميناليستيكالىق ءبولىم باستىعىنىڭ ورىنباسارى پوليتسيا پودپولكوۆنيگى و. كۋزمەنكو, ۋچاسكەلىك پوليتسيا ينسپەكتورى كاپيتان ا. باقتىباەۆ, مامانداندىرىلعان باتالون ينسپەكتورلارى اعا لەيتەنانتتار – ر. جۇماباەۆ جانە س. كيم جانە باسقالارى دا بار.