قايعىلى وقيعا 16 ماۋسىم كۇنى ساعات 19.00-دە بايماعامبەتوۆ كوشەسىندە بولعان. وبلىس ورتالىعىنىڭ 37 جاستاعى تۇرعىنى ۇستالدى, دەپ حابارلايدى Egemen.kz قوستاناي وبلىستىق پوليتسيا دەپارتامەنتىنىڭ ءباسپاسوز قىزمەتىنە سىلتەمە جاساپ.
«قايتىس بولعان ايەلدىڭ كىم ەكەنى انىقتالىپ جاتىر. قىلمىستىق كودەكستىڭ «ادام ءولتىرۋ» 99-بابىمەن قاراستىرىلعان سوتقا دەيىنگى تەرگەۋ باستالدى», دەپ حابارلادى پوليتسياداعىلار.
كۋاگەرلەردىڭ ايتۋىنشا, ەر ادام ايەلگە بىرنەشە رەت پىشاق سۇعىپ العان, كەيىن ءوزىن جاراقاتتاعان. سونداي-اق كۋاگەرلەر ەر ادامنىڭ قايتىس بولعان ايەلدىڭ بۇرىنعى كۇيەۋى بولعانىن ايتادى.
«پوليتسياعا وقيعا تۋرالى حابارلاما ساعات 18.51-دە ءتۇستى, جەدەل جاردەم 18.53-تە جەتتى. وقيعا ورنىنا جەتكەن دارىگەرلەر 1988 جىلى تۋعان ايەلدىڭ جەردە جاتقانىن كورگەن. ول جەدەل جاردەم كەلگەنگە دەيىن قايتىس بولعان», دەدى دەنساۋلىق ساقتاۋ باسقارماسىنىڭ ءباسپاسوز حاتشىسى كسەنيا جىلقىباەۆا.