ەلىمىزدىڭ وڭىرلەرىندە «مەرەيلى وتباسى» ۇلتتىق بايقاۋىنا قاتىسۋ ءۇشىن وتىنىمدەردى قابىلداۋ اياقتالدى. بەرىلگەن وتىنىمدەر سانى وتباسىلىق قۇندىلىقتاردى ناسيحاتتاۋ قازاقستاندىقتار اراسىندا وتە تانىمال جانە سۇرانىسقا يە ەكەنىن كورسەتتى, دەپ حابارلايدى Egemen.kz.
بيىل جاڭا ەرەجەلەر اياسىندا «مەرەيلى وتباسى» بايقاۋىنا قاتىسۋ وتىنىمدەرىن تەك وتباسىلاردىڭ وزدەرى عانا ەمەس, ءبىلىم بەرۋ, دەنساۋلىق ساقتاۋ, مادەنيەت ۇيىمدارى, ەڭبەك ۇجىمدارى, ونەركاسىپتىك كاسىپورىندار, ۇەۇ جانە باسقا دا زاڭدى تۇلعالار بەرگەنىن اتاپ ءوتۋ كەرەك.
ەنگىزىلگەن وزگەرىستەردىڭ ارقاسىندا وڭىرلىك كوميسسيالارعا بارلىعى 2768 ءوتىنىم, ونىڭ ىشىندە وتباسىلاردان – 1692, زاڭدى تۇلعالاردان - 1076 كەلىپ ءتۇستى.
وتىنىمدەردىڭ ەڭ كوپ سانى - الماتى (454), شىعىس قازاقستان (232) جانە قاراعاندى (223) وبلىستارىندا.
«مەرەيلى وتباسى» ۇلتتىق بايقاۋىنىڭ لاۋرەاتى اتاعى قىركۇيەك ايىندا وتباسى كۇنى قارساڭىندا قازاقستاننىڭ بارلىق وڭىرلەرىنەن كەلگەن 17 ۇزدىك وتباسىعا بەرىلەتىن بولادى. ماسەلەن, بۇرىن رەسپۋبليكالىق دەڭگەيدە ءبىر عانا وتباسى جەڭىسكە جەتكەن. اعىمداعى جىلدان باستاپ وڭىرلىك دەڭگەيدە جەڭىمپاز اتانعان بارلىق 17 وتباسىعا كونكۋرس لاۋرەاتى اتاعى بەرىلىپ, تەڭ ماراپاتتار بەرىلەتىن بولادى.
بۇدان باسقا, بيىلدان باستاپ كونكۋرسقا قاتىسۋعا ءوتىنىم بەرۋ, كونكۋرس ناتيجەلەرى بويىنشا ماراپاتتاۋ, كونكۋرس قورىتىندىلارىن انىقتاۋ جونىندەگى كوميسسيا قۇرامىنا ازاماتتىق قوعام وكىلدەرى عانا ەمەس, سونىمەن قاتار بايقاۋدىڭ بۇرىنعى جەڭىمپازدارى دا كىردى; جەڭىمپازداردى انىقتاۋ مەن باعالاۋدىڭ جاڭا بالدىق جۇيەسى بويىنشا شارتتىق وزگەرىستەر ەنگىزىلدى.
ەستەرىڭىزگە سالا كەتەيىك, ۇلتتىق بايقاۋدى ەلباسى ن.ءا. نازارباەۆ 2013 جىلدىڭ جەلتوقسانىندا بەكىتكەن بولاتىن. وسى ۋاقىت ىشىندە «مەرەيلى وتباسىعا» 15 مىڭنان استام وتباسى قاتىستى.