نۇر-سۇلتان قالاسىنىڭ اكىمى التاي كولگىنوۆ Instagram پاراقشاسىندا گازداندىرۋدى جۇرگىزۋ بارىسى تۋرالى ايتىپ بەردى, دەپ حابارلايدى Egemen.kz.
بيىل ەلوردادا 317 شاقىرىم جەلى سالىنادى, ونىڭ 170 شاقىرىمى ءبىرىنشى جارتىجىلدىقتا سالىندى.
«تاياۋ جىلدارى ەلوردا تولىقتاي گازعا قوسىلادى. قالاعا گاز جەلىسىن جۇرگىزۋ ەكولوگيانى ءبىرشاما جاقسارتۋعا سەپتىك ەتەدى, سەبەبى جەكە سەكتورداعى تۇرعىندار ۇيلەرىن ەندى كومىر جاعىپ جىلىتپايتىن بولادى, سونىمەن قاتار قاۋىپسىزدىك تە ارتتىرىلىپ, ازاماتتاردىڭ تۇرمىس جاعدايى جاقسارادى.
بۇگىن قالاداعى گاز جۇرگىزۋ جۇمىستارىنىڭ بارىسىمەن تانىستىم. كوكتال-1 ەلدى مەكەنى تولىعىمەن گازعا قوسىلدى. ول ءۇشىن شاعىن اۋداندا 70 كم گاز تاراتۋ جەلىلەرى سالىندى. تەك وسى ەلدى مەكەننىڭ وزىندە عانا 2600 ءۇي گازعا قوسىلۋ مۇمكىندىگىنە يە بولدى. گازدى ءۇيىنىڭ ىشىنە دەيىن تارتىپ العان كوكتال-1 ەلدى مەكەنى تۇرعىندارى گاز قوستىرۋ ءۇشىن «قازترانسگاز» اق-عا حابارلاسۋى كەرەك», دەپ جازدى ەلوردا اكىمى.
ودان بولەك, وڭتۇستىك-شىعىس, اگروگورودوك (جارتى بولىگى 2020 جىلى قوسىلماي قالعان ەدى), ءوندىرىس ەلدى مەكەندەرىندە گاز تاراتۋ جەلىلەرىن سالۋ جۇمىستارى جالعاسۋدا. سونىمەن قاتار «قازترانسگاز ايماق» اق كۇيگەنجار, ميچۋرينو, ينتەرناتسيونالنىي ەلدى مەكەندەرىندە گازبەن جابدىقتاۋ جەلىلەرىن سالۋدا.
وسىلايشا اتالعان ەلدى مەكەن تۇرعىندارى جاڭا جىلىتۋ ماۋسىمىندا ۇيلەرىن گازبەن جىلىتۋ مۇمكىندىگىنە قول جەتكىزەدى.
قالا اكىمىنىڭ ايتۋىنشا, گازداندىرۋ ۇدەرىسى كەستەگە ساي جۇرگىزىلۋدە. مىسالى, وتكەن جىلىتۋ ماۋسىمىندا جەلەزنودوروجنىي, كوكتال-2 ەلدى مەكەندەرى مەن اگروگورودوك ەلدى مەكەنىنىڭ ءبىر بولىگى گازعا قوسىلۋ مۇمكىندىگىنە يە بولدى. ول كەزدە 345 كم ىشكى كۆارتال جەلىلەرى سالىنعان. ال بيىل تاعى 317 كم, سونىڭ ىشىندە 170 كم جەلى العاشقى جارتىجىلدىقتا سالىندى.
«گازداندىرۋ باستالعالى بەرى ءۇيدى گازبەن جىلىتۋعا كوشىرۋ بويىنشا از قامتىلعان وتباسىلارعا الەۋمەتتىك كومەك بەرۋ مەحانيزمدەرى ەنگىزىلدى. الەۋمەتتىك كومەكتىڭ وسى ءتۇرىن الۋعا ءوتىنىمدى egov.kz ەلەكتروندى ۇكىمەت پورتالى ارقىلى بەرۋگە بولادى («ەلەكتروندىق وتىنىشتەر» - «قىزمەتكە ونلاين تاپسىرىس بەرۋ». مازمۇن جازىلاتىن باعاندا «تۇرعىن ءۇيدى گازداندىرۋعا الەۋمەتتىك كومەك» دەگەندى, الۋشى دەگەن باعاندا «جۇمىسپەن قامتۋ جانە الەۋمەتتىك قورعاۋ» دەگەندى باسۋ كەرەك).
سونىمەن قاتار بىلتىر گازعا تاريف باعاسى تومەندەتىلدى: ءبىر تەكشە مەتر گاز باعاسى 45 تەڭگەدەن 34,6 تەڭگەگە دەيىن ارزاندادى(بۇرىن ءبىر تەكشە مەتر ءۇشىن 60 تەڭگە بەلگىلەۋ تۋرالى ايتىلعان). جەكە سەكتور تۇرعىندارى ءۇشىن ءبىز ەسەپتەگىش قۇرالداردى تەگىن بەرۋدى قاراستىردىق.
«Halyk bank» اق جانە «ECOLER» قاۋىمداستىعىمەن بىرگە ۇيلەردى گازعا كوشىرۋ بويىنشا ازاماتتارعا پايىزسىز نەسيە بەرۋ ءىسىن ۇيىمداستىردىق.
سونداي-اق جىلۋ ەلەكترلىك ورتالىقتارىن جاڭعىرتۋدى جالعاستىرىپ جاتىرمىز. 1-جەو جانە 2-جەو بويىنشا ءتورت سۋ جىلىتۋ قازاندىعى گازعا كوشىرىلدى, وسى جىلدىڭ سوڭىنا دەيىن باسقا دا قازاندىقتاردى گازبەن جىلىتۋعا كوشىرەمىز.
گازداندىرۋ - ەلباسىنىڭ ستراتەگيالىق جوباسى. «سارىارقا» ماگيسترالدىق گاز قۇبىرى ورتالىق قازاقستان مەن ەلوردانى ەلدىڭ بىرىڭعاي گاز كولىك جەلىسىمەن قوسادى.
بۇل ۇدەرىس مەملەكەت باسشىسىنىڭ تىكەلەي باقىلاۋىنا الىنعان», دەپ جازدى ەلوردا اكىمى.